ବର୍ଷାରାଣୀ

ବର୍ଷା ଗୋ ତୁମେ ବରଷି ଯିବ କି

  ମୋ ମନ ମରୁରେ ଥରେ

ତୋଳି ଧରିବ କି କଣ୍ଠରେ ତୁମର

  ମେଘ ମହ୍ଲାର ବାରେ ।

କଦମ୍ବ ବନରେ ଶୁଭୁନି କାହିଁକି

   ତୁମ ପାଉଁଜି ଝଙ୍କାର

ଆକୁଳେ ଚାତକ ତୁମ ପଥ ଚାହିଁ

  ମନ ହେଲାଣି ଅସ୍ଥିର ।

ଗହୀର ବିଲରେ ସବୁଜିମା ସତେ

  ଲାଗେ ଆଜି ଫିକା ଫିକା

ଜହ୍ନିଫୁଲ ହସ ମଉଳି ଯାଇଛି

  ହୃଦୟେ ଲାଗିଛି ଦକା।

ପର୍ବତ ଶିଖରେ ତୁମରି ନୃତ୍ୟର

   ଝଙ୍କାର ଶୁଭୁନି ଆଉ

ନଭ ମେଖଳାରେ ଦୃଶ୍ୟ ହେଉନାହିଁ

   ତୁମ ରୂପ ଦାଉ ଦାଉ ।

କୃଷକ ଗାଉନି ମନ ମତାଣିଆ

   ରାମ ଲଇକ୍ଷଣ ଗୀତ

ବିଭୋର ହେଉନି ପରାଚୀ ଗଗନ

   ହୃଦେ ଜଳେ ଅବଶୋଷ ।

ଫୁଟୁନି କଦମ୍ବ ଛୁଟୁନି ମହକ

  ସତେ ଆଜି ତୁମ ବିନା

ଇନ୍ଦ୍ରଧନୁର ରଙ୍ଗ ଓଢଣୀଟା

  ଫିକା ଫିକା ଆଜି ସିନା।

ଅଭିମାନ ତେଜି ଆସିବ କି ଥରେ

   ମୋ ଜୀବନ ପଥ ଧାରେ

ଭିଜାଇ ଦେବ କି ମୋ ମନକୁ ଥରେ

   ତୁମ ପ୍ରୀତି ଆଶ୍ଲେଷରେ ।