ଶୋଭା

ଶିଶୁ ଶୋଭାପାଏ ମାଆର ଅଙ୍କରେ

ସରୋବରେ ନୀଳ କଇଁ

ସରଗ ରାଇଜେ ଜହ୍ନ ହସୁଥାଏ

ବାଦଲ ଉହାଡେ ରହି ।

ଅଜାଙ୍କର ହସ୍ତେ ଆଶା ବାଡିଟିଏ

ଗୁରୁଙ୍କର ହସ୍ତେ ବେତ

ଗାଆଁ ଆରମ୍ଭରେ ଗ୍ରାମବତୀ ଶୋଭେ

ମନ୍ଦିର ଚୂଡାରେ ନେତ ।

ଆଈଙ୍କ ପାଶରେ ପାନ ବଟୁଆଟେ

ଗୁଣୀ ପାଶେ ଶୁଦ୍ଧ ଜ୍ଞାନ

ଧନୀକର ପାଶେ ଧନ ଶୋଭାପାଏ

କରୁଥାଇ ଯଦି ଦାନ ।

ଅଗଣାରେ ଶୋଭା ତୁଳସୀ ଚଉରା

ଓଢ଼ଣୀରେ କୁଳବଧୂ

ନୀଳ କନ୍ଦରରେ କାଳିଆ ହସେରେ

ବାଣୀ ଶୋଭା ଥିଲେ ମଧୁ ।

କାନନେ ସୁମନ ରାଇଜେ ରାଜନ

ସଭାରେ ପଣ୍ଡିତ ଜାଣ

ସ୍ବାମୀ ପାଶେ ସତୀ ଅନ୍ଧାରରେ ବତୀ

ତୁଣୀରରେ ଥିଲେ ବାଣ ।

ଗିରିରେ ନିର୍ଝର ନିର୍ଝରରେ ଝର

ଶିଶୁ ଓଷ୍ଠେ ମିଠା ହସ

ବିଧୂରେ ଜୋଛନା ନୀଳଚକ୍ରେ ବାନା

ପଇଡରେ ଭରା ରସ ।

ଶିରାବଣେ ବାରି ଲଜ୍ଜାବତୀ ନାରୀ

ନାରୀ ମଥାନେ ସିନ୍ଦୂର

ଯୁଦ୍ଧ ବେଳେ ଭାଇ ବତ୍ସା ସାଥେ ଗାଈ

ଭକତ ମେଳେ ମନ୍ଦିର ।