ଶିକ୍ଷା
ଶିକ୍ଷା
ଜନମରୁ ମୃତ୍ୟୁ ଏଇତ ଜୀବନେ
ଅନେକ ଶିକ୍ଷା ଯେ ଥାଏ
ଏମିତି କେହି ତ ଜଣେ ହେଲେ ନାହିଁ
ଶିକ୍ଷା ବା ପାଇନି କିଏ ?
ଏଇ ଶିକ୍ଷା ପୁଣି ଅନେକ ପ୍ରକାର
ଅନେକ ପଦ୍ଧତି ଦେଇ
ଜୀବନ ସୁନ୍ଦର ମାର୍ଜିତ କରଇ
ସଠିକ ମାର୍ଗ ଦେଖାଇ ।
ପ୍ରତ୍ୟେକ ଜୀବନେ ଭଲ ଅଛି ପୁଣି
ମନ୍ଦ ବି ତ ରହି ଅଛି
ଭଲ ଶିକ୍ଷା ଯିଏ ପାଇ ଥାଏ ସିଏ
ଯଶ ଖ୍ୟାତି ତା ବଢିଛି ।
କୁଶିକ୍ଷା ସୁ ଶିକ୍ଷା ଦୁଇଟି ରହିଛି
ବିଚାର ଶକ୍ତି ତା ଭିନ୍ନ
କୁଶିକ୍ଷାରେ ଯିଏ ପଡି ଯାଇ ଥାଏ
ହୁଏ ସିଏ ମତି ହୀନ ।
ସୁଶିକ୍ଷା ବିଚାର ଶକ୍ତି ତା ଅନେକ
କୁପଥୁ ରଖେ ସେ ଦୂରେ
ସତ୍ୟ, ଧର୍ମ, ନ୍ୟାୟ ପଥ ସେ ଦେଖାଇ
ବିବେକ ଜାଗ୍ରତ କରେ ।
ବିଭିନ୍ନ କାର୍ଯ୍ୟର ବିଭିନ୍ନ ପ୍ରକାର
ଶିକ୍ଷା ରହିଅଛି ଭରା
ସେଇ ଶିକ୍ଷା ପୁଣି ଶିଖି ଏ ମାନବ
ବଞ୍ଚି ଅଛି ଏଇ ଧରା ।
ଯୁଦ୍ଧ କୌଶଳକୁ ଶିକ୍ଷା କରି ବୀର
ଦେଶ ସୁରକ୍ଷା କରଇ
ରଣ କୌଶଳକୁ ଶିକ୍ଷା କରି ସିଏ
ଶତ୍ରୁ ସଙ୍ଗେ ଲଢି ଥାଇ ।
ବିଦ୍ୟା ଶିକ୍ଷା କରି ବିଦ୍ୟାର୍ଥୀଟି ପଣି
ନିଜ ଗୋଡେ ଛିଡା ହୁଏ
ଚାକିରି ବା ବ୍ୟବସାୟ ,ଚାଷ କରି
ପରିବାର ପୋଷି ଥାଏ ।
ଛୋଟ ଶିଶୁଟିଏ ପରିବାର ଠାରୁ
ଯେମିତିକା ଶିକ୍ଷା ପାଏ
ସେହି ଅନୁସାରେ କୋମଳ ଶିଶୁଟି
ଆଗକୁ ଯେ ବଢିଥାଏ ।
ଝିଅଟିଏ ଭଲ ସଂସ୍କାର ଶିଖିଣ
କୁଳବଧୂ ସାଜିଥାଏ
କୁମନ୍ତ୍ରଣା ଶିକ୍ଷା ଦିଆଯାଏ ଯେବେ
ପରିବାର ଭାଙ୍ଗି ଯାଏ ।
ଛି ଛାକର ଯେ କରନ୍ତି ଅନେକ
ନିଜେ ବି ଘୃଣିତ ହୁଏ
ଶେଷରେ ପାଖରୁ ଦୂରେଇ ଯାଆନ୍ତି
ସାଥିରେ ନ ଥାନ୍ତି କିଏ ?
ସାଧୁ , ଚୋର, ଖଣ୍ଟ , ଲମ୍ପଟ,ଦୁର୍ମତି
କୁସଙ୍ଗ ଶିକ୍ଷା ବି ଭିନ୍ନ
ଟାଉଟର ଭଣ୍ଡାମୀ ଠାରୁ ଶିକ୍ଷା ନେବା
ମହଙ୍ଗା ପଡଇ ଅନ୍ନ ।
ଯେମିତି ଲୋକଙ୍କ ସଂସ୍ପର୍ଶେ ଯେ ଆସେ
ସେଇ ଶିକ୍ଷା ସିଏ ପାଏ
ସେହି ଅନୁସାରେ ତାହାର ଜୀବନ
ସେମିତିକା ହେଇଥାଏ ।
ରାଜନୀତି ଶିକ୍ଷା ଶିଖି ନ ପାରିଲେ
ହେଇ ପାରିବନି ନେତା
କୁଟନୀତି ବିଦ୍ୟା ଶିଖି ନ ପାରିଲେ
ହେବନି ଜଗତ ଜିତା ।
ଅନ୍ଧାର ଆଲୋକ ଫରକ ରହିଛି
ଖଟା ମିଠାର ବି ସ୍ବାଦ
ନିଜ ଭୁଲ ଶିକ୍ଷା ଜାଣି ପାରେ ସିଏ
ସେ ରାସ୍ତେ ଦିଏନି ପାଦ ।
ଭଲ ଲୋକ ଯଦି ଶିକ୍ଷା ପାଇଯାଏ
ଅନୁତାପ କରେ ସିଏ
ଦର୍ପଣ ପରିକା ଉଜ୍ଜଳ ସେ ହୁଏ
କୁପଥକୁ ଛାଡି ଦିଏ ।
ଘର ଭଙ୍ଗ ନୀତି ଶିକ୍ଷା ଦିଅ ନାହିଁ
ଆଖି ଲୁହ ଭରି ଦେବ
ମାନ ଚାଲି ଯିବ ସମ୍ମାନ ବି ଯିବ
ନିନ୍ଦିତ ଚର୍ଚ୍ଚିତ ହେବ ।
ଭଲ ଶିକ୍ଷା ଯଦି ଦେଇ ନ ପାରୁଛ
ମନ୍ଦ ଶିକ୍ଷା ଦିଅ ନାହିଁ
ସେଇ ମନ୍ଦ ଶିକ୍ଷା କରେ କଳଙ୍କିତ
ଚିର ଦିନ ଯାଏ ରହି ।
ନିଜ ସ୍ବାର୍ଥ ପାଇଁ ଫାଇଦା ଉଠାଇ
କୁଶିକ୍ଷା ଭଲ ଦିଅନ୍ତି
ମନେ ରଖିଥିବ ବିପଦ ସମୟେ
ପାଖରେ କେବେ ନ ଥାନ୍ତି ।
ସେମିତିକା ଶିକ୍ଷା କର ନାହିଁ ଜମା
ନିଜେ କଳଙ୍କିତ ହେବ
ମାନ ସମ୍ମନକୁ ହରେଇ ବସିବ
ଲଜ୍ଜାରେ ବୁଡି ମରିବ ll