ଶୀତ ବେଶ

ଓଢଣୀ ଷଷ୍ଠୀରୁ ଜଗନ୍ନାଥଙ୍କର

ଘୋଡ଼ଲାଗି ବେଶ ହୁଏ ।

ଶୀତ ବସନେ ପ୍ରଭୁଙ୍କର ଏ ବେଶ

ଭକତ ମାନସ ମୋହେ ।୧।

ଘୋଡ କୁହାଯାଏ ଶୀତ ବସନକୁ

ମଖମଲ ସୁତା କନା ।

ଏଥିରେ ତିଆରି ହୋଇଥାଏ ଘୋଡ

ସୁନ୍ଦର ଦିଶଇ ସିନା ।୨।

ଶ୍ରୀ ପଞ୍ଚମୀ ଯାଏଁ ଲାଗି ହୋଇଥାଏ

ଭିନ୍ନ ଭିନ୍ନ ରଙ୍ଗ ଘୋଡ ।

ରବିବାର ଲାଲ କଳାଛିଟ ମିଶା

ସୋମବାର ଶୁକ୍ଳ ଘୋଡ।୩।

ପଞ୍ଚରଙ୍ଗ ମିଶା ବାରପାଟିଆ ଘୋଡ

ଲାଗେ ମଙ୍ଗଳବାରେ ।

ବୁଧବାର ଦିନ ନୀଳରଙ୍ଗ ହଳଦୀ

ରଙ୍ଗ ଗୁରୁବାରରେ ।୪।

ଶୁକ୍ରବାର ଦିନ ଶୁକ୍ଲ ରଙ୍ଗ ଶନି

ବାରରେ କଳା ରଙ୍ଗର ।

ଘୋଡ ହୁଏ ଲାଗି ଲାଗିହୁଏ

ଆଠ ମୂର୍ତ୍ତି ସୁନା ଅଳଙ୍କାର । ୫।

ତ୍ରିଶାଖା ଦୁଇଟି କୁଣ୍ଡଳ ଚାରୋଟି

ତଡ଼ଗୀ ଦୁଇଟି ଲାଗେ ।

ବେନି ଭାଇ ବେଶ ହୁଅନ୍ତି ଏଥିରେ

ଭକତଙ୍କ ଅନୁରାଗେ ।୬।

ଦ୍ୱିପ୍ରହର ଧୂୂପ ସମୟ ହୋଇଲେ

ନରହଇ ଏହି ବେଶ ।

ଘୋଡଲାଗି ବେଳେ ସିଂହାସନ ତଳେ

ପୂଜା ହେଉଥାଏ ଶେଷ ।୭।

ଶ୍ରୀ ପଞ୍ଚମୀ ଠାରୁ ଫଗୁଦଶମୀର

ଦିିନ ଯାଏଁ ଦିଅଁମାନେ ।

ଠିଆ ଘୋଡ଼ ପରିଧାନ କରିିଥାନ୍ତି

ଏକଥା କିଏ ନଜାଣେ ।୮।

ଜାମାଲାଗି ବେଶ କହନ୍ତି ଏହାକୁ

ତିରିଶି ମୂରତି ସୁନା ।

ଅଳଙ୍କାର କରିଥାନ୍ତି ପରିଧାନ

ବିଚିତ୍ର ଦିଶନ୍ତି କିନା ।୯।

ଶ୍ରୀ ଅଙ୍ଗ ସମ୍ପୂର୍ଣ୍ଣ ଘୋଡାଇ ନହୁଏ

କେବେହେଲେ ଏ ବେଶରେ ।

ମାନବୀୟ ଲୀଳାରତ ଜଗନ୍ନାଥ

ବେଶ ଶୀତ ରକ୍ଷା କରେ ।୧୦।