ମୁଁ ଭଲ ପାଠକଟିଏ ହେବି
ମୁଁ ଭଲ ପାଠକଟିଏ ହେବି
କରିଅଛ ପ୍ରଭୁ ମୋତେ ପାଠକ ସଂସାରେ
କେତେବଡ଼ ଆଶୀର୍ବାଦ ମୋର ମସ୍ତକରେ |
ତୁମ ଆଶୀର୍ବାଦ ଦେଲା ମୋତେ ଯେଉଁ ଶକ୍ତି
ଶୋଷିତ ବଞ୍ଚିତ ଦୁଃଖେ ଦିଏ ଅଭିବ୍ୟକ୍ତି |
ଦୁଃସାହସ ବଳେ ସାଧେ ମୋ ଜୀବନ ଲକ୍ଷ୍ୟ
ସ୍ଥିତାବସ୍ଥା ସମସ୍ୟାକୁ ଖଞ୍ଜିଦିଏ ପକ୍ଷ |
ମଣିଷ ଜନମନେଇ ଯଦି ନାହିଁ ଜ୍ଞାନ
ଜନମ ତାହାର ବୃଥା ବୋଲାଏ ଅଜ୍ଞାନ |
ଚିନ୍ତନ ଲିଖନ ପୁଣି ଶ୍ରବଣ ପଠନ
ସବୁ ଜ୍ଞାନ ବୋଧଗମ୍ୟ ହେବା ହିଁ ଧାରଣ |
ପଠନ କାର୍ଯ୍ୟଟି ସିଦ୍ଧ ଯଦି କରିପାର
ତେବେ ଦିଶିବ ତାହାକୁ ସଂସାର ସୁନ୍ଦର |
ସେହିଗୁଣ ଶ୍ରେଷ୍ଠଗୁଣ ପଛା ନାହିଁ ଦିଶେ
ସୁଧାରିବ ଶତଭୁଲ ନିର୍ଭୁଲ ବିଶେଷେ |
ଦୁଇହାତ କପାଳରେ ଦେଇ ଭାବୁଥିଲେ
କିଏ କିଛି କରିପାରେ ଉତ୍ସାହ ହାରିଲେ ।
ପଡିଛି କି ରାସ୍ତେ ଖୁସି ଖୋଜିଲେ ମିଳଇ
ନିଜକୁ ଗଢିତୋଳିବା ନିଜତ୍ବ ଅଟଇ |
କର୍ମ ର ସାର୍ଵଭୌମିକ ନିୟମ ଆଧାରେ
ସୂକ୍ଷ୍ମ ରୂପେ ସଞ୍ଚାଳିତ ସବୁ ଏ ସଂସାରେ |
ଆଚରଣ, ବ୍ୟବହାର, ସଂସ୍କାର, ଦର୍ଶନ
କିଛି ଅପେକ୍ଷା ଯାହାର ରଖ ପ୍ରାପ୍ତି ଗୁଣ |
ମନ୍ଦିରେ ଭୋଗ ଚଢାଇ କାମନା ପୂରଣ
ଏଡେ ଅଳ୍ପ ମୂଲ୍ୟ ଦେଲେ କି ସୁଧୁରେ ଜୀବନ |
ଏପରି ଆଶା ତ ନିଶ୍ଚେ ହୋଇଥାଏ ବ୍ୟର୍ଥ
ସାର୍ଥକ ଜୀବନ ପାଇଁ ଲୋଡ଼ା ଜ୍ଞାନପଥ |
ସୁଜ୍ଞାନର ପ୍ରବନ୍ଧନ ମୁଖ୍ୟ ହିଁ ପଠନ
ଭ୍ରମିତ ମନକୁ ବାନ୍ଧେ ଦେଇଣ ସମ୍ମାନ |