କାଶତଣ୍ଡୀ ହସିଲା

ଆସିଲା ଶରତ ଓହ୍ଲାଇ ମରତ

  ଧରଣୀ ସୁନ୍ଦର ଦିଶିଲା

ନଈ ପଠାପରେ ବର୍ଣ୍ଣିଳ ଛଟାରେ

  ଫୁଟି କାଶତଣ୍ଡୀ ହସିଲା ।

ଧବଳ ଚାମର ଧରି ନିରନ୍ତର 

  କ୍ଷିତି ଶିରେ ଛତ୍ର ତୋଳିଲା

ବାତ ତାଳେ ତାଳେ ଆଲଟି ଚଞ୍ଚଳେ

 ଧରଣୀର ବ୍ୟଥା ହରିଲା ।

ନୀଳ ଗଗନରେ ଧଳା ମେଘମାଳେ

  ଜହ୍ନ ଲୁଚକାଳି ଖେଳିଲା

ଧିରେ ଗୋଳିପାଣି ନୀଳ ଦିଶିଲାଣି

  ଗାଧୁଆର ମଜା ମିଳିଲା ।

ସାଗୁଆ କ୍ଷେତରେ ଧରଣୀ ବକ୍ଷରେ

  ଅପୂର୍ବ ଶୋଭା ଚହଟିଲା

ଧରି ଦିଗବଳୟ ସବୁଜ ବଳୟ

  ପାହାଡ଼ ପର୍ବତ ଘୋଟିଲା ।

କୁମୁଦ କମଳ ଫୁଟି ସରୋବର

  ଅତି ମନୋହର ଦିଶିଲା

ଫୁଲେ ଫୁଲେ ବୁଲି ମଧୁ ଶୋଷି ଅଳି

  ଗୁଣୁ ଗୁଣୁ ସ୍ୱନେ ଭାଷିଲା ।

ମାଆ ଦଶଭୁଜା ଭବାନୀ ଗିରିଜା

 ଦଶହରା ପର୍ବ ଆସିଲା

ମେଢ଼ ମଣ୍ଡପରେ ଆତସବାଜିରେ

  ପଲ୍ଲୀରୁ ସହର କମ୍ପିଲା ।

ଦେବୀ ପୂଜନରେ ବ୍ୟସ୍ତ ନାରୀନରେ

  ଭୁବନ ସୁଷମା ବଢ଼ିଲା

ମାଆର ଆଶିଷେ ହୃଦୟ ସରସେ 

  ଖୁସିର ଲହରୀ ମାଡ଼ିଲା ।

ଜନ୍ମାଷ୍ଟମୀ ତିଥି ଗଣେଶ ଚତୁର୍ଥୀ

  ବଳଭଦ୍ର ପୂଜା ପଡ଼ିଲା

ଅନନ୍ତବରତ ପୁଣ୍ୟ ଭାଗବତ

  ଜନ୍ମ ତିଥି ପୋଥି ବଢ଼ିଲା ।

କୁଆଁର ପୁନେଇ ପରବେ ଘନେଇ 

  ପୁଚି ଖେଳେ ମନ ରସିଲା

ଝିଅଙ୍କ ପରବ ଖୁଦରକୁଣିରେ

  କାଗଜ ନଉକା ଭାସିଲା ।

ସବୁର ପରଶେ ମନର ହରଷେ

  କାଶତଣ୍ଡୀ ପ୍ରଭା ଛୁଟିଲା

ଅଭାବହଟିଲା ହାସ ଉକୁଟିଲା

  ନୂଆଖାଇ ପର୍ବ ଜୁଟିଲା ।