ବରଷା ରାଣୀ ଗୋ ଆସ
ବରଷା ରାଣୀ ଗୋ ଆସ
ବରଷାରାଣୀ ଗୋ ଆସ
ମେଘ ସଵାରୀରେ ପବନ ସାଥିରେ
ଭାସି ଭାସି ତୁମେ ଆସ |
ପିନ୍ଧି କଳାମେଘୀ ଶାଢ଼ୀ
ବିଜୁଳି ହସରେ ରିମ ଝିମ ସ୍ୱରେ
ଘଡ଼ଘଡ଼ି ବାଦ୍ୟ ବାଢ଼ି |
ମଉସୁମୀ ସଖୀ ଧରି
ଟପର ଟପର ପୟର ନୂପୁର
ନାଚିଯାଅ ମନ ଭରି |
ଧରା ତାତି ଦୂରକର
ଅସରା ଅସରା ବରଷାର ଧାରା
ଢାଳି ଦିଅ ଉର୍ବୀପର |
ଦେଖି ତୁମ ଆଡମ୍ବର
ବନରେ ମୟୂର ଖୋଲିଦେଇ ପର
ନାଚୁ ତୋଳି କେକା ସ୍ୱର |
ପୂର୍ଣ୍ଣ ହେଉ ଜଳାଶୟ
ହଟୁ ଗ୍ରୀଷ୍ମଭୟ ହେଉ ଜଳମୟ
ହସୁ ସବୁଜ ବଳୟ |
କୃଷକ ହେଉ ପ୍ରସନ୍ନ
ଧାନ ବେଉଷଣ ରୁଆ କାର୍ଯ୍ୟମାନ
ଶୁଭେ କରୁ ସମ୍ପାଦନ |
ସବୁଜ ତୃଣ ପ୍ରାନ୍ତର
ନାଲି ଟୁକୁ ଟୁକୁ ସାଧବବୋହୂକୁ
ଦେଖିବାରେ କି ସୁନ୍ଦର |
ଭେକ ରଡ଼ି କର୍ଣ୍ଣ କଟୁ
ନିଶିଥେ ପ୍ରଖର ଏ ବିରକ୍ତିକର
ଝିଁ ଝିଁ ଝିଙ୍କାରି ରଟୁ |
ନଦୀରେ ନଆଣ ବଢ଼ି
ତଡ଼ିନେଇ ସୁଖ ଦେବନାହିଁ ଦୁଃଖ
ଅଭାବରେ ଯିବୁ ସଢ଼ି |
ସ୍ୱାଗତ ହେ ବର୍ଷାରାଣୀ
ଜଗତପାଳିନୀ କଲ୍ୟାଣ କାରିଣୀ
ଖୋଲ ସୁଷମାର ଖଣି |