କେଡ଼େ ସୁନ୍ଦର ସାଜଇ

କେଡ଼େ ସୁନ୍ଦର ସାଜଇ ଲୋ, କଳାମେଘରେ ବିଜୁଳି 

ଶ୍ୟାମ ଶୈଳ ଚୂଳେ ଧଳା ମେଘଖଣ୍ଡ 

            ରାଇ କୋଳେ ଶିଖୀଚୂଳି ଲୋ |

ନଈକୁ ସୁନ୍ଦର ନାଆ ଲୋ, ଆକାଶେ ଚନ୍ଦ୍ରଉଦିଆ 

କହ୍ନେଇ ବଦନେ ବଇଁଶୀ ସୁନ୍ଦର 

            ଶିବ ଶିରେ ଗଙ୍ଗା ମାଆ ଲୋ |

ନରକୁ ସୁନ୍ଦର ମୁଛ ଲୋ,  ନାରୀକୁ ସୁନ୍ଦର କୁଚ 

ବହିକୁ ସୁନ୍ଦର ଛବିଳ ମଲାଟ 

          ମୟୂରକୁ ଶୋହେ ପୁଚ୍ଛ ଲୋ  |

ଗିରିକୁ ସୁନ୍ଦର ଶୃଙ୍ଗ ଲୋ, ପଦ୍ମକୁ ସୁନ୍ଦର ଭୃଙ୍ଗ 

ଦେବାଳୟ ଚୂଳେ ପତାକା ସୁନ୍ଦର 

          ଚିଲିକାକୁ ଶୋହେ ଖଗ ଲୋ |

ସଧବା ଭାଲେ ସିନ୍ଦୂର ଲୋ, କ୍ଷେତକୁ ବାଡ଼ ସୁନ୍ଦର 

ବାହାଘର ପାଇଁ ରୋଷଣୀ ସୁନ୍ଦର 

          ମୁକୁଟ ରାଜନ୍ୟ ଶିର ଲୋ |

କୂଅକୁ ଚାନ୍ଦିନୀ ବେଢ଼ା ଲୋ, ପୋଖରୀକୁ ଶୋହେ ହୁଡ଼ା 

ଜଙ୍ଗଲ ସୁନ୍ଦର ବାଘ ମାମୁଁ ଥିଲେ 

           ପୁଅକୁ ସୁନ୍ଦର ପଢ଼ା ଲୋ |

ହାତୀକୁ ସୁନ୍ଦର ଦାନ୍ତ ଲୋ, ଘରକୁ ସୁନ୍ଦର ଛାତ 

ଗଛ ଲତା ଥିଲେ ଧରଣୀ ସୁନ୍ଦର 

           ସୁନାବେଶେ ଜଗନ୍ନାଥ ଲୋ |

ଫଣୀକୁ ସୁନ୍ଦର ଫଣା ଲୋ, ମଶାଣିକୁ ଶୋହେ ବଣା 

ସାଗରେ ସୁନ୍ଦର ଉତ୍ତାଳ ଲହରୀ 

           ବୋଇତକୁ ପାଲ ଟଣା ଲୋ |

ଗଡ଼ିଆକୁ ମାଛଚାଷ ଲୋ, କେଦାରକୁ ଧାନ୍ୟଶସ୍ୟ 

କୁଳବଧୂ ଶିରେ ଓଢ଼ଣା ସୁନ୍ଦର 

           ଓଠକୁ ସୁନ୍ଦର ହସ ଲୋ |

ଗାୟକକୁ ମିଠା କଣ୍ଠ ଲୋ, କାତିକୁ ସୁନ୍ଦର ବେଣ୍ଟ 

ସାହିତ୍ୟକୁ ପରା କବିତା ସୁନ୍ଦର, 

           ନଦୀକୁ ସୁନ୍ଦର ଘାଟ ଲୋ |

ଘରକୁ ବିଜୁଳି ବତୀ ଲୋ, ନେତାଙ୍କୁ ଖଦଡ଼ ଧୋତି 

ବାବାଜୀଙ୍କୁ ସାଜେ ଗେରୁଆ ବସନ 

           ଚୋରକୁ ଅନ୍ଧାର ରାତି ଲୋ |

ସରକୁ ଶୋଭା କମଳ ଲୋ, ମଥାକୁ ଚାରୁ କୁନ୍ତଳ 

ଭୂମଣ୍ଡଳ ଶୋଭା ଭାରତ ବରଷ 

            ଉତ୍କଳରେ ନୀଳାଚଳ ଲୋ |

ଓଟକୁ ସୁନ୍ଦର କୁଜ ଲୋ, ଜଗାକୁ ଖଣ୍ଡିଆ ଭୁଜ 

ଧରମ ସୁନ୍ଦର ପର ଉପକାର 

            ଛିଟା ଚିହ୍ନେ ଶୋହେ ମୃଗ ଲୋ |

ନାରୀକୁ ସୁନ୍ଦର ଲଜ୍ଜା ଲୋ, ଲତାକୁ ସୁନ୍ଦର ରଞ୍ଜା 

ଜଗନ୍ନାଥ କହେ ଭକତି ସୁନ୍ଦର 

           କର ବିଭୁ ପଦ ପୂଜା ଲୋ |