ଶିବ ମହିମା

ବେଙ୍ଗ ଡାକ ଦେଲା ଶ୍ରାବଣ ଆସିଲା

ସାଥିରେ ବରଷା ଘେନି

ଦେଖି ଚଉପାଶ ସବୁଜିମା ବେଶ

ଖୁସିରେ ହସେ ଧରଣୀ ।

ଖାଲି ଖୁସିପରା ନୁହେଁ ବସୁନ୍ଧରା

ଖୁସି କାଉଡ଼ିଙ୍କ ମନ

ପାଣି ଭାର ନେଇ ଯିବେ ସାଥୀ ହୋଇ

ପ୍ରଭୁଙ୍କୁ କରିଣ ଧ୍ୟାନ ।

ଯାଆନ୍ତି ଆଶାରେ କାଉଡ଼ି ବେଶରେ

ଆବାଳ ବୃଦ୍ଧ ବନିତା

ଢାଳି ସୋମବାରେ ଜଳ ଶିବ ଶିରେ

ଜଣାନ୍ତି ମନର କଥା ।

ସୃଷ୍ଟି ରକ୍ଷାପାଇଁ ଶିବ ବିଷ ପିଇ

ନୀଳକଣ୍ଠ ବୋଲାଇଲେ 

ଦୁଃଖୀ ଓଠେ ହସ ଫୁଟେ ବାର ମାସ

ଶଙ୍କର ସୁଦୟା କଲେ ।

ଶିବ ମହାଯୋଗୀ ଶିବ ମହାତ୍ୟାଗୀ

ମହାଦେବ ପୁଣି ସିଏ

ସର୍ବଶ୍ରେଷ୍ଠ ସେହି ତାଙ୍କ ବିନା କେହି

ମହାପଦବାଚ୍ଯ ନୁହେଁ ।

ନିଷ୍ଠା ସହ ରହି ଶିବ ଗୁଣ ଗାଇ

ଯାଅ ବେଗେ ଭାର ନେଇ

ପ୍ରଭୁ ମହାଦେବ ସଭିଙ୍କ ଅଭାବ

ନିମିଷେ ଦେବେ ଦୂରେଇ ।