ଶବ୍ଦମୟ ପ୍ରତାରଣା

କବିତା - ଶବ୍ଦମୟ ପ୍ରତାରଣା
ରଚନା - ପଞ୍ଚାନନ ଜେନା
 ତାରିଖ -୦୫-୦୧-୨୦୨୫
 +++++++++++++++++
 ଇଛାଥିଲେ ଉପାୟ
 ମନଥିଲେ ସହାୟ
 ଅସମ୍ଭବରୁ ହେବ କି ସମ୍ଭବ ଉଦୟ ?

 ବୁଦ୍ଧିଥିଲେ ପ୍ରୟାସ
ବୃଦ୍ଧିହେବ ଆୟସ
ଦୁଃଖରୁ ହେବ କି ସୁଖର ନୀଳୟ ?

 ଭକ୍ତି ଥିଲେ ଆତ୍ମାରେ
 ଶକ୍ତିଥିଲେ ହୃଦୟରେ
 ଅନିଶ୍ଚିତତାରୁ ହେବ କି ନିଶ୍ଚିତ ବଳୟ ?

 ବିବେକ ଥିଲେ ଆଚାରେ
କରୁଣା ଥିଲେ ବ୍ୟବହାରେ
ଶୋକରୁ ହେବ କି ସୁଖସମୃଦ୍ଧିର ଆଶ୍ରୟ?

 ଅର୍ପଣ ଥିଲେ କର୍ମରେ
 ତର୍ପଣ ଥିଲେ ଧର୍ମରେ
 ସମସ୍ୟାରୁ ହେବ କି ଶାନ୍ତି ପ୍ରଶାନ୍ତି ମହନୀୟ ?

 ବିଶ୍ୱାସ ଥିଲେ କାର୍ଯ୍ୟରେ
ନିଃଶ୍ୱାସ ଥିଲେ ଦେହରେ
 ଜଞ୍ଜାଳ ଖଣ୍ଡପ୍ରଳୟରୁ ହେବ କି ମଧୁମଳୟ ?

 ଯେମିତି
 ଜହ୍ନ ରାଇଜରେ ଜାଗାଟିଏ
 ସାଗର କୂଳରେ ମହଲଟିଏ
ବିଶଲ୍ୟକରଣୀରୁ ଗିନାଟିଏ
ସ୍ବପ୍ନପ୍ରବଣ ଭାବନା ହେବ କି ମଧୁମୟ ?

 ଯେମିତି
 ବିଶ୍ଵ ଭ୍ରମଣର ସୁଯୋଗଟିଏ
ବିଳାସ ବ୍ୟସନର ସୁବିଧାଟିଏ
 ନିରୋଗୀ ବୈରାଗୀ ଶରୀରଟିଏ
 ବାଞ୍ଛନୀୟ କଳ୍ପନା ଜଳ୍ପନା ହେବ କି କରଣୀୟ ?

 ସବୁ ଲାଗେ ଶବ୍ଦମୟ ପ୍ରତାରଣା
ଆକାଶ କୁସୁମ ସମ ଅସମ୍ଭବ ଅବଧାରଣା
 ସବୁ ପରା କପାଳ ଲିଖନ
ସବୁ ପରା ବିଧିର ଅଧିନ
 ଅଦୃଷ୍ଟର ହାତରେ ଜଉକଣ୍ଢେଇ
 ସୂତା ଅଗରେ ଲଟକିଛି ସମୟର ଅଝଟ ପାଉଣା