ଶାମ୍ବ ଦଶମୀ

ଗ୍ରହଙ୍କର ହର୍ତ୍ତା-କର୍ତ୍ତା ଯେ ସବିତା

ଆର୍ଯ୍ୟମା, ଭାନୁ ମିହିର

ତାହାଙ୍କର ପୂଜା ଉପାସନା ପାଇଁ

ଶାମ୍ବ ଦଶମୀ ପର୍ବର ।

ଦ୍ଵାପର ଯୁଗରୁ ପାଳନ ଯେ କରୁ

ଅଛନ୍ତି ଭାରତବାସୀ

ପୌରାଣିକ ମତ ସଂସ୍କୃତି ମହତ୍ତ୍ଵ

ଘେନିଣ ଯେ ଗରିୟସୀ ।

ମହିମା ଭାସ୍ୱର ହୋଇ ଚିରକାଳ

ନାଶେ ରୋଗ, କଷ୍ଟ ,ପୀଡା

ସେ ଶାମ୍ବ ଦଶମୀ  ପୂଜନ୍ତି ଦ୍ୟୁମଣୀ

ଅର୍ପନ୍ତି ଭୋଗ ଉଖୁଡା ।

ପଉଷ ମାସରେ ଶୁକ୍ଳ ପକ୍ଷରେ

ପଡଇ ଶାମ୍ବ ଦଶମୀ

ପ୍ରତି ଜନମନ ଆନନ୍ଦ ଘେନିଣ

ସୂର୍ଯ୍ୟ ଉପାସନା ପାଇଁ ।

ହୁଅନ୍ତି ତତ୍ପର ଗ୍ରାମ,ପଲ୍ଲୀ,ପୁର

ହୁଏ ଉତ୍ସବମୁଖର

କରନ୍ତି ସଭିଏଁ ପରମ ତୃପ୍ତିରେ

ପୂଜନ ଘେନି ବିଧିର ।

ଦୁର୍ବାସା ମହର୍ଷି ଅଭିଶାପ ବର୍ଷି

ଶାମ୍ବଙ୍କୁ କଲେ ପୀଡ଼ିତ

ଦୁରାରୋଗ୍ୟ ବ୍ୟାଧି ଘେନି ନିରବଧି

ଶାମ୍ବ ହୋଇଲେ ତାପିତ ।

ନିରାକରଣର ମାର୍ଗ ବତାଇଣ

କହିଥିଲେ ସେ ଦୁର୍ବାସା

ଗ୍ରହରାଜ ସୂର୍ଯ୍ୟ ଉପାସନା କାର୍ଯ୍ୟ

କଲେ ଦୂର ଏ ଦୁର୍ଦ୍ଦଶା ।

ଏହା ପରେ ଶାମ୍ବ ମାତା ଜାମ୍ୱବତୀ

ଦ୍ଵାରକା ତେଜି ତୁରିତ

ପ୍ରବେଶ ପବିତ୍ର ପୂଣ୍ୟ ଅର୍କକ୍ଷେତ୍ର

ଚନ୍ଦ୍ରଭାଗା ତୀର ସ୍ଥିତ ।

ଉତ୍କଳ ପ୍ରଦେଶେ ତପସ୍ୱୀର ବେଶେ

ଜାମ୍ୱବତୀଙ୍କ ସହିତ

ଦ୍ବାଦଶ ବରଷ ରହି ଅହର୍ନିଶ 

ରବିଙ୍କୁ କଲେ ତୃପତ ।

ଦେବ ବିବସ୍ୱାନ ସନ୍ତୋଷେ ଅର୍ପଣ

କରିଲେ ଶାମ୍ବ ଅଭିଷ୍ଟ 

ବରଦାନ କରି ଆପେ ନେଲେ ହରି

ଯନ୍ତ୍ରଣା ଓ ରୋଗ କଷ୍ଟ ।

ସେବେଠାରୁ ପ୍ରତି ବରଷ ହେଉଛି

ଶାମ୍ବ ଦଶମୀ ପାଳନ

ସୂର୍ଯ୍ୟ ଉପାସନା ବିଧି କରି ନାନା

ବ୍ୟାଧି ଠାରୁ ପରିତ୍ରାଣ ।

ହରିଦ୍ରା ଘଟିଟ ଜଳେ ହରିଦସ୍ଵ

ବିମ୍ୱକୁ ଅବଗାହନ  

କୁସୁମ ଚନ୍ଦନ ନୈବେଦ୍ୟ ପ୍ରଦାନ

ଧୂପ ଦୀପ ଅର୍ପଣ ।

କରି କରାଅନ୍ତି  ନାରୀମାନେ ସେବି

ସବିତା ତୃପ୍ତି ବିଧାନ

ସୁତ,ସୂତାଙ୍କର ନିରୋଗ ଶରୀର

ନିମିତ୍ତ ହୁଏ ପାଳନ ।