ସ୍ବପ୍ନ

ଜୀବନ ନଦୀର ଉଦାସିଆ ତୀରେ

ଶୁଭୁଛି କରୁଣ ଗୀତି,

ହୃଦୟେ ଜଳୁଛି ଯନ୍ତ୍ରଣାର ଅଗ୍ନି

ମନେ ନିରାଶାର ତାତି l

ସମୟ ଶୀତଳ ବିନ୍ଦୁ ହୋଇ କେବେ

ଖସିବ ଉତ୍ତପ୍ତ ଗାତ୍ରେ,

ତୃଷିତ ଓଠରେ ପୁଟିବ ମହ୍ଲାର

ଝରିବ ଜୀବନ ପାତ୍ରେ l

ଧରାରୁ ହଜିବ ନିଦାଘର ମାୟା

ଶ୍ରାବଣର ସୁଷମାରେ,

ଜୀବନ ଛୁଇଁବ ଶାନ୍ତି ମୋଉସୁମି

ପ୍ରଭୁଙ୍କର ଆଶିଷରେ l

ଆନନ୍ଦର ବଂଶୀ ବାଜିବ ଅଧୀରେ

ମନ ଯମୁନାର କୂଳେ,

ବିଦାୟ ନେବ ଏ ଦୁଃଖର ସମୟ

ଧୈର୍ଯ୍ୟ ବିଶ୍ୱାସ ବଳେ l

ସଭିଙ୍କ ମୁଖରେ ଦେଖାଦେବ ପୁଣି

ପ୍ରେମର ରଶ୍ମି ରେଖା,

ଭଲପାଇବାର ବେଳାଭୂମି ପରେ

ପ୍ରିୟଜନେ ହେବ ଦେଖା l