ସାଇତା

ତମ ସାଥେ ଥରେ କଥା ହେବା ପାଇଁ

     ମିଳେନି ସମୟ ମୋତେ

ତଥାପି କାହିଁକି ପଚାରି ବୁଝୁଛ

    କେମିତି ଅଛି ମୁଁ ସତେ ll1

ତମ ସେ ମଧୁର କେଇପଦ କଥା

    ମନେ ମୋର ରହିଯାଏ 

ଚାହଁ ବା ନ ଚାହଁ ଦିଅ ବା ନ ଦିଅ 

     ଉତ୍ତରକୁ ଚାହିଁଥାଏ ll2

ଆଜିକାଲି ଏହି ସଂସାର ଭିତରେ

    ଦହଗଞ୍ଜ ଦେହ ପ୍ରାଣ

ନିଶ୍ବାସ ଫେରାଇ ପ୍ରଶ୍ବାସ ନେବାକୁ

     ହୋଇଯାଏ ହଇରାଣ ll3

ଥିଲ ଯେବେ ଏକା ମିଳିଗଲା ସଖା

     ବଦଳିଲା ପରିଚୟ

ଜୀବନ ସହଜ ନୁହଇ ମରତେ

      ବଞ୍ଚିବା ହୁଏ ଅଥୟ ll4

ତମ ପରିଚୟ ପାଇଗଲ ତମେ

      ଆଉ କି ପଚାର ମୋତେ

ଯେତେ ଦିନ ଥିବ ସୂରୁଯ ଆକାଶେ

     ସାଇତି ରଖିବି ସତେ ll5