ପ୍ରିୟତମା

ତମ ପାଇଁ ଯେବେ ଲେଖେ ମୁଁ କବିତା

     ଆଖିରୁ ଝରାଇ ଲୁହ

ମନର ଭାବନା ଅନ୍ତର ବେଦନା

     ହୃଦୟରୁ ଉଠେ କୋହ ll 1

ସାଗର ବେଳାର ଶାମୁକାର ସ୍ମୃତି

    ମୁକ୍ତାହୀନ ଶୁଷ୍କ ବାଲି

ପାରିନି ଲିଭାଇ  ଜୁଆରିଆ ଢେଉ 

    ଅଛି ପାଦ ଚିହ୍ନ ଖାଲି ll 2

ଝାଉଁବଣ କାନ୍ଦେ କାନ୍ଦେ ଉର୍ମିମାଳା

      ଗଲ ଯେବେ ତମେ ଚାଲି

ପୂନେଇ ଜହ୍ନଟା  କାନ୍ଦେ ଲୁଚି ଲୁଚି

      ଆଖିରୁ ଜୋଛନା ଢାଳି ll 3

ମିଞ୍ଜି ମିଞ୍ଜି ତାରା  ରାତ୍ରର ନିଶବ୍ଦେ

      ବାହୁନେ ତମକୁ ନିତି

ବିରହୀ ଚକୋରୀ  ପାଗଳୀ ପରାଏ

       ଗାଏ ଆମ ପ୍ରେମ ଗୀତି ll 4

ମେଘ ଘଡଘଡି   ବିଜୁଳି ଆଲୋକେ

     ଢାଙ୍କି ଦିଏ ତାର କାନି

ନୟନରୁ ବାରି  ବହେ ଧାର ଧାର 

     ଲେଖେ ମୁଁ ନୂଆ କାହାଣୀ ll 5

      

 ମୋ ଜୀବନ ଦୀପ  ଲିଭି ତ ଗଲାଣି 

      ପ୍ରିୟତମା ତମ ବିନା 

ଜଳୁଛି ହୃଦୟ  ତମ ବିଛେଦରେ

      ତାକୁ ଲିଭାଇ ପାରେନା ll 6