ପ୍ରେମର ପରିଭାଷା

 

ତମେ ଗଲା ପରେ ମୋତେ ଏକା କରି 

   ଚାହିଁଛ କି ଥରେ ଫେରି 

ଜୀବନଟା ଏଠି ନରକ ହୋଇଛି 

    ମନଟା ଯାଇଛି ମରି ll 1

କେତେ ଯେ ବିଲୁଆ, କୁକୁର, ଶାଗୁଣା 

   ଚାରି ଆଡେ ଶୁଭେ ସ୍ବର 

ନିଶ୍ବାସ ପ୍ରଶ୍ବାସ ଚଳୁନାହିଁ ଆଉ 

   ଲାଗୁଛି ଯେମିତି ଡର ll 2

ଦିନ ରାତି ଏକା ଲାଗେ ଅନ୍ଧକାର 

    ଅସହାୟ ନିସ୍ବ ପରି 

ବିଶ୍ବାସ ପାଉନି କାହାକୁ ମୋହର 

    ସବୁ ତ ଯାଇଛି ହାରି ll 3

ମାନ ଅଭିମାନ ପ୍ରେମ ପ୍ରୀତି ରାଗ 

    ଲିଭି ତ ଯାଇଛି ମନୁ

ଜଳନ୍ତା ନିଆଁରେ ଜଳୁଛି ଖାଲି ମୁଁ 

    କ୍ଷୀଣ ହୋଇଲାଣି ତନୁ ll 4

     

ଆଶାର ବୁକୁରେ ସମ୍ପର୍କର ସେତୁ 

     ଭୂଷୁଡି ଯାଇଛି କେବେ 

ବିଶ୍ବାସର ବାଲି ରେଣୁ ଗଦା କଲେ 

     ଗଢି କି ହୋଇବ ଏବେ ll 5

ପ୍ରେମ ପରିଭାଷା ପ୍ରେମର ମହତ 

   ତମେ କି ବୁଝିବ ସତେ ?

ତମେ ଚାଲିଗଲ ଏକା ହୋଇ ସିନା 

    ଦାଣ୍ଡେ ଠିଆ କରି ମୋତେ ll 6