ସ୍ୱର୍ଗଶିରୀ

କୃଷ୍ଣ କରିଥିଲେ ଗୋପଲୀଳା ଏଠି

ଦୁଆରୀ କରନ୍ତି ଭାରତ ଲୀଳା

ଛାନ୍ଦ ଚଉପଦୀ ଗାଆନ୍ତି ସୁସ୍ୱରେ

କଷ୍ଟକର ଶିକ୍ଷା ଜୀବନ କଳା ।

ଦେବଦେବୀ ରୂପେ ଠାଣିମାଣି ରଚି

କରୁଛି ମଣିଷ କେତେ ସୁଆଙ୍ଗ

ଭାବନା ରାଇଜେ ଉଡିବୁଲେ କବି

ଭାବ ପାରାବାରେ ଖେଳେ ତରଙ୍ଗ ।

ଭାବ ଭକତିରେ ଶକତି ନିହିତ

ପ୍ରକୃତି ଅକ୍ଷରେ ହୁଏ ଜୀବନ୍ତ

ସିଦ୍ଧାନ୍ତ ସ୍ୱରୂପେ ହୁଏ ସୁଗଠିତ

ରୂପ ରସ ଗୁଣ ଛନ୍ଦ ଆବଦ୍ଧ ।

ପ୍ରଭୁ କୃଷ୍ଣ ଚନ୍ଦ୍ର କଷ୍ଟ ଲବ୍ଧ ଫଳ

ଶକତି ସଂଯୋଗେ ଶବ ହିଁ ଶିବ

ବଲ୍ମୀକରେ ବସି ଘୋଷି ମରା ମରା

ରତ୍ନାକର ପାଏ ରାମଙ୍କ ଖୋଜ ।

ସବୁ ଅଭିନୟ ଲୀଳା ବା ସୁଆଙ୍ଗ

ବେଦ ପୋଥି ମନ୍ତ୍ର ଇତିହାସ

ଫଳଦାୟୀ ହୁଏ ବିଷୟ ସକଳ

କର୍ମ ହେଲେ ସତ୍ୟ ଆଧାରିତ ।

ଉତ୍ତମ ସୁଗୁଣ ବରଣେ ଚରିତ୍ର

ଆଚରଇ ବୁଦ୍ଧି ସତସାହସ

ପରୋପକାର ରେ ଜୀବନ ସାର୍ଥକ

ହୁଏ ସ୍ୱର୍ଗଶୀରି ସୁଖ ପ୍ରାପ୍ତ ।

ଶକ୍ତି ଯୋଗମାୟା ଦିଅନ୍ତୁ ଅଭୟ

ପ୍ରକାଶିତ ହେଉ ସତ୍ୟାଲୋକ

ପାଳନ୍ତୁ ସକଳ କର୍ତ୍ତବ୍ୟ ମର୍ଯ୍ୟାଦା

ନାରୀ ପୁରୁଷ ଭେଦ ବାଧକ ।

ଏକ ଅନୁରୂପ ସର୍ଜନ କରମ

ସ୍ୱଧର୍ମ ହେଉ ଅନୁସରଣ

ଅରଜନ୍ତୁ ସର୍ବେ ଯଶ ଓ କୀରତି

ସ୍ୱସ୍ତିକ ରେ ହେଉ ଉଦବରଣ ।

   ---------------