ରଥଯାତ୍ରା
ରଥଯାତ୍ରା
ଆଷାଢ଼ ମାସର ଶୁକଳ ଦ୍ୱିତୀୟା
ରଥଯାତ୍ରା ମହାପର୍ବ
ପୁରାଣ ପ୍ରସିଦ୍ଧ ଶ୍ରୀକ୍ଷେତ୍ର ପୁରୀର
ଲୀଳା ଅନୁପମ ଦିବ୍ୟ ।
ବିଧି ବିଧାନରେ ନିର୍ମିତ ହୁଅଇ
ପ୍ରତିବର୍ଷ ତିନି ରଥ
ନାଲି ନୀଳ କଳା ହଳଦୀ ବର୍ଣ୍ଣର
ବସ୍ତ୍ରେ ହୁଏ ସୁସଜ୍ଜିତ ।
ନନ୍ଦିଘୋଷ ରଥେ ସାରଥି ଦାରୁକ
ରକ୍ଷକ ସ୍ୱୟଂ ଗରୁଡ଼
ମାତଳୀ ସାରଥି ତାଳଧ୍ଵଜ ରଥେ
ରକ୍ଷପାଳ ବାସୁଦେବ ।
ଦେବଦଳନରେ ଅର୍ଜୁନ ସାରଥି
ଜୟଦୁର୍ଗା ଅଧିଷ୍ଠାତ୍ରୀ
ଗଙ୍ଗା ଓ ଯମୁନା ମହାଦେବୀ ଦ୍ୱୟ
ଦ୍ୱାର ରହିଥାନ୍ତି ଜଗି।
ଗୋଟି ପହଣ୍ଡିରେ ବିଜେ ହୋଇଥାନ୍ତି
ଜଗନ୍ନାଥ ବଳଦେବ
ଶାୟିତ ପହଣ୍ଡି କରନ୍ତି ସୁଭଦ୍ରେ
ଦିବ୍ୟ ଚକ୍ର ସୁଦର୍ଶନ ।
ତାମ ଯାନେ ବସି ବୀର ଗଜପତି
ଆସନ୍ତି ମୁଖ୍ୟ ସେବକ
ବିଧି ବିଧାନରେ କରିଥାନ୍ତି ସେବା
ମାର୍ଜନୀ ଧରି ସ୍ୱହସ୍ତ ।
ପୂଜା ନଇବେଦ୍ୟ ଅର୍ପଣ ପୂର୍ବକ
କରିଥାନ୍ତି ଭକ୍ତି ସ୍ତୁତି
ଜଗତ କଲ୍ୟାଣ କାରଣ ନିମନ୍ତେ
ପ୍ରଣମନ୍ତି ମଥା ପାତି ।
ବଡ଼ ଦାଣ୍ଡେ ରଥ ଚଳଇ ଉତ୍ତରେ
ଏକକୋଶ ଦୀର୍ଘ ପଥ
ବାଟରେ ପଡଇ ମାଉସୀ ମନ୍ଦିର
ଦରଶନ ଭେଟଘାଟ ।
ଶରଧା ବାଲିରେ ଗୁଣ୍ଡିଚା ମନ୍ଦିର
ଜନ୍ମସ୍ଥଳୀ ବ୍ରହ୍ମବେଦୀ
ସାତଦିନ ପ୍ରଭୁ ରହନ୍ତି ସେଇଠି
ଚାଲେ ଗୁହ୍ୟ ନୀତି କାନ୍ତି ।
ଦଶମୀ ତିଥିରେ ବାହୁଡ଼ା ବିଜୟ
ପ୍ରଭୁଙ୍କର ସୁନାବେଶ
ଶ୍ରଦ୍ଧାଳୁ ଭକ୍ତଙ୍କ ଲାଗଇ ଗହଳି
ଦର୍ଶନେ ମିଳଇ ମୋକ୍ଷ ।
ଲକ୍ଷ ଲକ୍ଷ ଲୋକ ହୋଇଥାନ୍ତି ରୁଣ୍ଡ
ଟାଣନ୍ତି ରଥ ଦଉଡ଼ି
ରଥରେ ବାମନ କରିଲେ ଦର୍ଶନ
ଯମ ଦଣ୍ଡ ଯାଏ ଛାଡି ।
ଗୈ।ରବ ଉଜ୍ଜ୍ବଳ ଆମ ପରମ୍ପରା
ଶ୍ରୀ ଜଗନ୍ନାଥ ସଂସ୍କୃତି
ବ୍ରହ୍ମ ପଦ୍ମ ସ୍କନ୍ଦ କପିଳ ସଂହିତା
ଗାଏ ଘୋଷ ଯାତ୍ରା ସ୍ମୃତି ।