ଦେବଦାସୀ

ଆଜିବି ନାଚୁଛି ଦେବଦାସୀ 

ଉର୍ଦ୍ଧାୟିତ ରାତିର ଶିଖାରେ 

ନିଜେ ଜଳି ମହକାଇ ଦିଏ 

ଶ୍ରୀମନ୍ଦିରର କୋଣ ଅନୁକୋଣ ।

ପବିତ୍ର ଭାବନାତାର 

କରୁଣ ଚାହାଣୀର ବାଙୟତାରେ 

ପ୍ରଲମ୍ୱିତ ହୋଇଯାଏ ପଥ 

ମାଟିରୁ ମେଦିନୀ 

ଯେଉଁ ପଥ ଦେଇ 

ଓହ୍ଲାଇ ଆସନ୍ତି ସ୍ୱର୍ଗରୁ ଦେବତା 

ସେହି ନିଶୀଥରେ ।

ସ୍ୱାର୍ଥା ନାହିଁ, ସ୍ୱପ୍ନ ନାହିଁ 

ନାହିଁ ଆଶା କି କୌଣସି ଲୋଭ ତାର 

ସବୁ ମାୟା ମୋହର ଉର୍ଦ୍ଧରେ 

ନାଚୁଛି ସେ ଏଇମିତି ନାଚୁଥାଏ 

ସାରାରାତି 

ତା ଜୀବନ ଥିବା ଯାଏ । 

ଥମିଯାଇନି ପାଦ ତାର କେବେ 

ଘୁଙ୍ଗୁର ବି ହେଇନି ଅବଶ 

ଜନ୍ମାଜନ୍ମନ୍ତରର ଦାସୀ ସିଏ 

ଏକା କାଳିଆର ।