ରେଡ଼ିଓର ବେଦନା
ରେଡ଼ିଓର ବେଦନା
ନାମ ମୋହର ରେଡ଼ିଓ ଜନକ ମାର୍କୋନି l
ନୋବେଲବିଜୟୀ ସିଏ ଇଟାଲୀ ବିଜ୍ଞାନୀ ll
ତାର ଦରକାର ନାହିଁ ନାମ ମୋ ବେତାର l
ଶବ୍ଦ ତରଙ୍ଗେ ମୁଁ କରେ ଇଥରେ ଆହାର ll
ଆକାଶୁ ବାଣୀ ଶୁଣାଏ ମୁଁ ଆକାଶ ବାଣୀ l
ବିଶ୍ୱ ଯାକ ନାଟ,ଗୀତ,ତଥ୍ୟ ଛାଣି ଛାଣି ll
ବର୍ଲିନ ନଗରେ ଥାଇ ନେତାଜୀ ସୁଭାଷ l
ମୁଁ ସୁଭାଷ ବୋଲୁଅଛି କଲେ ଦେଶଭାଷ ll
ଆଲୁଅଟେ ଲିଭି ଗଲା ଆମରି ଦେଶରେ l
ଖବର ମୁଁ ଦେଲି ଯାଇ ପ୍ରତି ଘରେଘରେ ll
ବାଂଲା ଦେଶ ମୁକ୍ତି ଯୁଦ୍ଧେ ତସ୍କର ନିଆଜି l
ଦନ୍ତେ ତିରଣ ଧରିଲା, ଖାଇଲା ପିଆଜି ll
ପ୍ରଭାତେ ଶୁଣାଏ ସର୍ବେ ଵିଭୂଙ୍କ ବନ୍ଦନା l
ଏହି ଧାରା ଏବେସୁଦ୍ଧା ପଡ଼ିନାହିଁ ଉଣା ll
ନାଟ,ଗୀତ,ଶିକ୍ଷା,ଚମ୍ପୁ,ଛାନ୍ଦ ପୁଣି ପାଲା l
ବନ୍ୟା ଝଡ଼ ସମୟରେ କରିଥାଏ ହାଲ୍ଲା ll
ମନୋରଞ୍ଜନରେ ମୋର ସରିହେବ କିଏ l
ବିନାକାଗୀତରେ ଅମିନ ସାହାନୀ କହେ ll
କିଶୋର,ରଫି,ଲତାଙ୍କ ଜନ୍ମ ମୋହଠାରୁ l
କେତେ ଗୀତି,କଥାକାର,ସଙ୍ଗୀତଜ୍ଞ ଗୁରୁ ll
ଜାଣିଥିବ ଖୋକାଭାଇ କିର୍ତ୍ତୀ ଯା ଅକ୍ଷୟ l
ମୋଠାରୁ ଜନମି ଗୀତେ ଜୟ ଜୟ ଜୟ ll
କିବା ଆଉ ଭାଇ ମୁଁ କହିବି ଗୋଟି ଗୋଟି l
ହତାଦରେ ଛାତି ମୋର ଯାଉଅଛି ଫାଟି ll
ମୁଁ କାଳେ ହୋଇଛି ଏବେ ଏକ ଇତିହାସ l
ହଂସା ମୋ ଯାଉଛି ଉଡି଼ ମାଡୁଅଛି ହସ ll
ଦୂର ଦର୍ଶନ ପ୍ରୀତିରେ ଭୁଲନାହିଁ ମୋତେ l
ସୁଖଦୁଃଖ ବେଳେ ମୁହିଁ ରହିଅଛି ସାଥେ ll
ସଂକ୍ଷେପେ କହିଲି ଭାଇ ମୋର ଇତିବୃତ୍ତ l
ଆଦରେ, ଯତ୍ନେ ରଖିବ ମୁଁ ତୁମର ଭୃତ୍ୟ ll