ବୈକୁଣ୍ଠ

ସୃଷ୍ଟି, ପାଳନ, ସଂହାରର କର୍ତ୍ତା

     ଅଟନ୍ତି ତିନି ଠାକୁର

ଭକତି ଭାବରେ ତାଙ୍କରି ପାଦରେ 

     କରୁଛି ଭକ୍ତି ଜୁହାର ।

ପିତାମହ ବ୍ରହ୍ମା ସୃଷ୍ଟି କର୍ତ୍ତା ଆମ

     ବିଷ୍ଣୁ ଯେ ପାଳନ କର୍ତ୍ତା

ଦେବ ଦେବ ମହାଦେବ ସଂହାରକ

     ଅଟନ୍ତି ଭାଗ୍ୟ ବିଧାତା ।

ବ୍ରହ୍ମ ଦେବ ବାସ ସ୍ଥାନ ବ୍ରହ୍ମପୁର 

     କୈଳାସରେ ମହେଶ୍ୱର 

ଲକ୍ଷ୍ମୀ ନାରାୟଣ ଯୋଉଠି ଥାଆନ୍ତି 

     ସିଏ ତ ବୈକୁଣ୍ଠ ପୁର ।

ବୈକୁଣ୍ଠ ଭୁବନ ଅତି ଶୋଭାବନ

      ସେନେହ, ଶରଧା ଝରେ

ଶାନ୍ତିମୟ ଅଟେ ସେଇ ସ୍ଥାନ ଗୋଟି

      ଥାନ୍ତି ସର୍ବେ ଆନନ୍ଦରେ ।

ସେହି ସ୍ଥାନ ଅଟେ ଏତେ ପବିତ୍ର 

      ପାପ କରଇ ଖଣ୍ଡନ 

ସ୍ନେହ, ଆଶୀର୍ବାଦେ କୋଳେଇ ନିଅନ୍ତି

    ଭକ୍ତେ ଲକ୍ଷ୍ମୀ ନାରାୟଣ ।

ସମସ୍ତେ ଚାହାଁନ୍ତି ମର୍ତ୍ତ୍ୟେ ଆମ ଘର

    ହେଉ ଯେ ବୈକୁଣ୍ଠ ପୁର

ସ୍ନେହ, ଶ୍ରଦ୍ଧା ଆମ ଝରୁ ଅବିରତ

     ନାହିଁ ଯାର ପଟ୍ଟାନ୍ତର ।

ଗୋଟିଏ ସେନେହ ଡୋରେ ବନ୍ଧା ହେଇ

     ବିତି ଯାଉ ଆମ ଦିନ

ଦୁଃଖରେ ସୁଖରେ ହେଇ ଆମେ ସାଥି

     କଟାଇ ଦେବୁ ଜୀବନ ।

ସ୍ୱର୍ଣ୍ଣପୁରୀ ଲଙ୍କା ବୈକୁଣ୍ଠ କରିବା

     ପାଇଁ ବିଶ୍ରବା ନନ୍ଦନ 

ଋଷି ବେଶେ ଯାଇ ଜନକ ନନ୍ଦିନୀ 

     ସୀତାଙ୍କୁ କଲେ ହରଣ ।

ମା' ଲକ୍ଷ୍ମୀ ଆସିଲେ ଆସିବେ ନିଶ୍ଚୟ

      ପ୍ରଭୁ ଦେବ ନାରାୟଣ

ଏଇ କଥା ଭାବି ପୁଷ୍ପକ ବିମାନେ

     ଚୋରି କରିଲା ରାବଣ ।

ଲଙ୍କା କଟକକୁ ବୈକୁଣ୍ଠ କରିବା

    ଥିଲା ରାବଣ ସପନ

ସେଇ ସପନକୁ ପୂରଣ କରିଣ

    ହେଇଥିଲା ସେ ନିଧନ ।

ହେଲେ ଆଜିକାଲି କଳି କାଳ ଯୁଗ

     ଓଲଟା ବିଚାର ନୀତି

ବୈକୁଣ୍ଠର ପୁର ନ ହେଉ ପଛକେ

      ଘରେ ଚାଲୁ ରଜନୀତି ।

ଘର ଲକ୍ଷ୍ମୀ ବୋହୁ ଦେଖିବା ସପନ

      ଅଶାନ୍ତି ସୃଷ୍ଟି ସେ କରେ

ସମସ୍ତଙ୍କୁ ହାତ ମୁଠାରେ ନଚାଏ

     ଏ ସମାଜ ତାକୁ ଡରେ ।

ଯେଉଁ ଘରେ ନାରୀ ଲକ୍ଷ୍ମୀ ପରି ଅଟେ

   ସିଏ ତ ବୈକୁଣ୍ଠ ପୁର

ସେମିତିକା ଘରେ ଲକ୍ଷ୍ମୀ ନାରାୟଣ 

    ରହିଥାନ୍ତି ନିରନ୍ତର ।

ଅନ୍ନ, ବସ୍ତ୍ର କେବେ ଅଭାବ ରହେନି

       ଶାନ୍ତି ଝରେ ନିରନ୍ତର 

ସରଗଠୁ ବଳି ଅତି ସୁଖେ ତାର

      ରହିଥାନ୍ତି ପରିବାର ।

ଯେଉଁ ଘରେ ନିତି ଝଗଡା ହୁଅଇ 

     ମା' ଲକ୍ଷ୍ମୀ ହୁଅନ୍ତି ଦୂର

ଅଶାନ୍ତି ଲୁହେ ସେ ପରିବାର ଥାଏ

    ହୁଏନା ବୈକୁଣ୍ଠ ପୁର ।