ମୋହାଚ୍ଛନ୍ନ ମଧୁହାସେ

ନିରବ ନିଶିଥ ନିଃଶବ୍ଦେ ପାହିଲା

ନୀର ଭିଜା ନୟନରେ

ନୀଳ ସପନରେ ଆର୍ଦ୍ର ତନୁମନ

ଭିଜୁଥିଲା ସପ୍ରେମରେ ll

ଆସ ପ୍ରଭୁ ତୁମେ ବର୍ଣ୍ଣାଳୀ ଆଭାରେ

ତପନର ସ୍ୱାଗତରେ

ଦୁନିଆ ଦାଣ୍ଡରେ ପ୍ରତିଧ୍ୱନି ଶୁଭୁ

ତୁମ ନାମ କରୁଣାରେ ll

ତୁମରି ବାସରେ ତୁମରି ଆସରେ

ସୁଗନ୍ଧିତ ହେଉ ଧରା

ତୁମରି ବନ୍ଧନେ ବାନ୍ଧିଦିଅ ପ୍ରଭୁ

ହସିବ ସଂସାର ସାରା ll

ତୁମ ବିନା ଏଠି ଆଉ ସବୁ ମିଛ

ମରୀଚିକା ପଛେ ଧାଇଁ

ମୋର ମୋର କହି ଚିତ୍କାର କରି

ହେଉ ଅଛୁ ଧଇଁ ସଇଁ ll

ମୋହ ମାୟା ଠାରୁ ରଖହେ ଦୂରେଇ

ବଞ୍ଚିଥିବା ଯାଏ ଦଣ୍ଡେ

ହାତେ ମୋର ଥାଉ ପଢିବାକୁ ତଵ

ଗୀତା, ଭାଗବତ ଖଣ୍ଡେ ll

ଭିଜି ତୁମ କାମେ ଭଜି ତୁମ ନାମେ

ମଧୁର ମଧୁର ରାସେ

ସ୍ବର୍ଗୀୟ ଆନନ୍ଦ ଲଭୁଥିବି ସଦା

ମୋହାଚ୍ଛନ୍ନ ମଧୁହାସେ ll