ରାହାସ ପୂର୍ଣ୍ଣିମା

ବହିଲାଣି ଧୀର ବାୟୁ ପରିମଳ

ନିର୍ମଳ ଶରଦକାଳ

ପ୍ରକାଶନ୍ତି ଶଶୀ ବିମଳ ଜୋଛନା

ବିକଶନ୍ତି ତାରାଫୁଲ ।

ଚହଟେ ସୁବାସ ସୁମନ ଫୁଲରେ

ଫୁଟିଲାଣି ପଦ୍ମ କଇଁ

କାଳିନ୍ଦୀ କୂଳରେ କଦମ୍ବ ମୂଳରେ

ବିଜୟ କଳା କହ୍ନାଇ ।

ବିଚାରନ୍ତି ମନେ ଆଜ ବୃନ୍ଦାବନେ

ଆରମ୍ଭିବେ ରସରାସ

ବାଜଇ ପଞ୍ଚମେ ବିରହ ମୂରଲୀ

ବିଭୋର ଗୋପୀ ମାନସ ।

ଧରି ରାଈ ନାମ ପୁକାରେ ମୂରଲୀ

ଗୋଟି ଗୋଟି ଗୋପୀ ନାମ

ଅଧୀର ଉଚ୍ଛନ୍ନ ଗୋପୀ ଷୋଳଶସ୍ର

ଉଚ୍ଚାଟନ ବ°ଶୀସ୍ୱନ ।

ତ୍ରିଭଙ୍ଗୀ ଛନ୍ଦରେ ବେଶ ନଟବର

କୃଷ୍ଣଚନ୍ଦ୍ର ଗୋପୀନାଥ

ନୃତ୍ୟ ଛନ୍ଦରସେ ତଲ୍ଲୀନ ଜୀବନ

ମହାନନ୍ଦ ରସରାସ ।

ନିର୍ଝରେ ଅମୃତ ପ୍ରେମ ପୂର୍ଣ୍ଣକାମ

ବିନାଶେ ମାୟାପଟଳ

ଅଭୟ ଆଶ୍ରୟ ଧ୍ୟାୟୁ ଚିତ୍ତ ମନ

ଶ୍ରୀରାଧାକୃଷ୍ଣ ପୟର ।

 ------