କେଡେ ଅମାନିଆ ସତେ ଏ ବରଷା

କେଡେ ଅମାନିଆ ସତେ ଏ ବରଷା

ରିମିଝିମି ସୁରେ ସଙ୍ଗୀତ ଗାଇ

ଶରୀର ମନକୁ କରୁଛି ଚଗଲା

ପ୍ରୀତିର ଆବେଗେ ଭିଜାଇ ଦେଇ ।

ଧୀରେ ଛୁଇଁଦେଇ କହୁଛି କାନରେ

ସାଥି ବିନା ଏକା ଭିଜିବୁ କାହିଁ

ଦୁହିଁଙ୍କ ହୃଦୟେ ବିରହ ଯାତନା

ହରିନେବି ଆଜି କ୍ଷଣିକ ପାଇଁ ।

ବ୍ୟାକୁଳ ହୃଦୟ ଅଥୟ ଅଧିର

ପାଦ ସାଥେ ପାଦ ତାଳ ପକାଇ

ପ୍ରୀତିର ପୁଲକେ ନାଚିଯାଅ ଆଜି

ସ୍ମୃତିରୁ ବିସ୍ମୃତି ହୋଇବ ନାହିଁ ।

ହୃଦୟ ଭାବକୁ ନିରବ ଓଠରେ

ଆଙ୍କିଦିଅ ସବୁ ସୀମାକୁ ଡେଇଁ

ଲେଖିଦିଅ ଗୋଟେ ଅଭୁଲା କାହାଣୀ

ଆଖି ସାଥେ ଆଖି ମିଶେଇ ଦେଇ ।

ଗଢିଦିଅ ମନେ ବିରାଟ ମହଲ

ପ୍ରୀତିର ରଙ୍ଗରେ ରଙ୍ଗୀନ ହୋଇ

ଦୂରତ୍ୱ ବହଳ ଆସ୍ତରଣ ଚିରି

ପ୍ରୀତି ହସୁଥାଉ ଫୁଲେଇ ହୋଇ ।