Library
ପ୍ରତିକ୍ରିୟା
ପ୍ରତିକ୍ରିୟା
ଯେତେ ଦୁଃଖ ଦେବୁ ଦେରେ କାଳିଆ
ପ୍ରତିକ୍ରିୟା ନାହିଁ ମୋର
ଡାକୁଛି ତୋତେ ମୁଁ ଡାକୁ ଥିବି ନିତି
ଯିବା ଯାଏ ଜୁଇ ଘର ।
ଲହୁ ଲୁହାଣରେ ଭରି ଦେ ଜୀବନ
ତଥାପି ଛାଡିବି ନାହିଁ
ପାଉଛି ମୁଁ ଭଲ ପାଉଥିବି ତୋତେ
ବଞ୍ଚି ଥିବା ଯାଏ ମୁହିଁ ।
ତୋ ପାଖରେ ଥିବି ତୋତେ ସେବୁ ଥିବୁ
ତୋ ପାଦେ ମନ ମୋ ଦେଇ
ଯେତେ ଯନ୍ତ୍ରଣା ତୁ ଭରି ଦେ ଜୀବନେ
ଯିବିନି କେବେ ଦୂରେଇ ।
ଛାଇ ଆଲୁଅର ଏଇ ମୋ ଜୀବନ
ଅଶାନ୍ତି ନିଆଁରେ ଜଳେ
ଝଡ ତୋଫାନରେ ଦଦରା ନାଆ ମୋ
ଭାବୁଛି ଭବର ଜଳେ ।
ଫୁଲ ତୁ ନେଇଣ କଣ୍ଟା ବିଛେଇଲୁ
ଅଛି କିବା ପ୍ରତିକ୍ରିୟା
ଏତିକି ମାଗୁଣୀ ମୋ କଳା ଠାକୁର
କରି ଥିବୁ ସଦା ଦୟା ।
ସୁଖ ଶାନ୍ତି ସବୁ ଛଡେଇ ନେ ତୁ
କିଛି ପ୍ରତିକ୍ରିୟା ନାହିଁ
ପାଖୁ ଯଦି ମୋର ଦୂରେଉ କାଳିଆ
ଛାଡିବିନି କେବେ ମୁହିଁ ।
ତୋ ପାଇଁ ବଞ୍ଚିଛି ତୋ ହସୁଛି
ତୋ ପାଇଁ ଗାଉଛି ଗୀତ
ଏ ମନ ହୃଦୟ ତୋତେ ସମର୍ପିଛି
ପାଦେ ତୋର ପ୍ରଣିପାତ ।
ଲାଜକୁଳି ଲତା ଛୁଇଁ ଦିଏ ଯିଏ
ପ୍ରତିକ୍ରିୟା ସାଙ୍ଗେ ସାଙ୍ଗେ
ସ୍ବାର୍ଥ ଯେଉଁଠାରେ ଲୁଚିଛି କାଳିଆ
ବାଟ ସେଇ ଠାରେ ଭାଙ୍ଗେ ।
ଜୀବନକୁ ନେଇ ଖେଳୁଛୁ ଭଲ ତୁ
ଦେଖୁଛୁ କି ପ୍ରତିକ୍ରିୟା
ଠକି ଭଣ୍ଡେଇ କି ଯିବୁନି କହୁଛି
କରିବୁନି କିଛି ମାୟା ।
ମାୟାଧର ତୁହି ଜାଣିଛି ଜଗତ
ଠିକଣା ନାହିଁ ତୋ କିଛି
ଭାବରେ ବନ୍ଧା ତୁ ହେଇଛୁ କାଳିଆ
ଅଭାବକୁ ଦୂର ଅଛି ।
ତୁ ପାଖରେ ଥିଲେ କିଛି ଲୋଡା ନାହିଁ
ନାହିଁ ପ୍ରତିକ୍ରିୟା କିଛି
ରହିଥିବି ସଦା ତୋ ପାଦେ କାଳିଆ
ଏ ପଥ ନେଇଛି ବାଛି ।
