ପ୍ରତୀକ୍ଷା

ସବୁଥର ଭଳି ଅପେକ୍ଷିତ, ଅହଲ୍ୟା

ଥରେ ଆସି କହିଦିଅ କ୍ଷମା ଦେଲି, 

ସାଉଁଟି ନିଅ , ଅସରନ୍ତି ଅଭିଯୋଗ ର ଯାତନା ରୁ ମୁକ୍ତି ଦିଅ। 

ଥରୁଟିଏ କହିଦିଅ ଭଲପାଏ ବୋଲି, 

ଫଗୁଣର ବାସ ଚହଟିବ ମନରୁ ମନକୁ, 

ବଉଳ ଫୁଲର ମହକ ବାସିବ ସମୀରେ , 

ଭାଷା ହୀନ, ନିଶବ୍ଦ ହୃଦୟର 

ଅଜ୍ଞାତ ଆକର୍ଷଣେ ସମର୍ପିତ ହେବ ସମସ୍ତ ଜୀବନ ।

ପାଦ ଧ୍ୱନି ଶୁଣି ବାକୁ କେତେ ଯୁଗର ଅପେକ୍ଷା

ଖୋଲା ରହେ ଚକ୍ଷୁ ଦେଖିବାକୁ ଥରୁଟିଏ 

ସେ ସୁଶୋଭିତ ସ୍ୱରୂପ।

   

 ନିସ୍ତାରିବି ମୁଁ, 

ଶେଷ ହେବ ଏ ସମସ୍ତ ଦୁଖ ଅନୁଶୋଚନା

 ଶେଷ ହେବ ସମସ୍ତ ନିନ୍ଦା ଅପବାଦ 

 ଥରୁଟିଏ କହିଦିଅ ଆସୁଅଛି ବୋଲି,

 ଶେଷ ହେବ ସମସ୍ତ ଯୁଗର ପ୍ରତିକ୍ଷା ।

  

ଅଭିଶାପର ଅନ୍ଧକାର ଦୂରେଇବ, 

ପୁନର୍ବାର ମୋ ମୁକ୍ତିର ପଥ ହେବ କୁସୁମିତ

ପ୍ରତିଥାର ଥାଅ ତୁମେ, ମୋ ସହ ଅଦୃଶ୍ଯ ଆକାରେ।