ଲାଇବ୍ରେରୀ
ପ୍ରୋଫାଇଲ୍
ପ୍ରତାରଣା ଗୀତ ଗାଇ
ପ୍ରତାରଣା ଗୀତ ଗାଇ
ତମେ ନୀଳ ସାଗରର ଫେନାୟିତ ଢେଉ ତରଙ୍ଗାୟିତ ଉର୍ମି,ମୁଁ ସେହି ଅଲୋଡା ସାଗର ବେଳାର ଶାମୁକା ରହିଛି ଭ୍ରମି,କେତେ ଯେ ସପନ କେତେ ଯେ ଭାବନା
ଉର୍ମି ଗୋ' ନିଅ ଚୁମ୍ମି ।
ପାଏନା ମୁଁ କୁଳ କିନାରା ସଜନୀ
ତମ' ପ୍ରତୀକ୍ଷାର ବେଳା
ବାଲୁକା ବଳୟେ ଏକା ଏକା ମୋର
ଅଶାନ୍ତ ଢେ଼ଉରେ ଖେଳା
ଅନେକ ଭେଟିଛି ତମକୁ ଗୋ' ଉର୍ମି
ସହିଛି କାମନା ଜ୍ଵାଳା ।
ଦେଖାହୁଏ ସିନା ପାରେନାହିଁ କହି
ଛାତି ତଳ ମନକଥା
କେତେଯେ ଭାବନା କରେ ଆନମନା
ହୃଦୟରେ କେଦେ ବ୍ଯଥା
ବୁଝି ବି ଅବୁଝା ତମେ ଗୋ ସଜନୀ
କରନାହିଁ ତିଳେ ଚିନ୍ତା ।
ହସି ହସି ଆସି କଡ଼ ଲେଉଟାଇ
ବେଳାପରେ ମଥାପିଟି
ଫେରିଯାଅ ତମ ବାରଂବାର ସଖି
ଫେନାୟିତ କୁଳ ଛାଟି
ଆଡ ଆଖିରେ ତ ଦେଖନା ଥରୁଟେ
ଶାମୁକା ର କେଉଁ ତ୍ରୁଟି ।
ଭଲ ମୁଁ ପାଉଛି ଭଲ ପାଉଥିବି
ଜୀବନ ତମାମ ଉର୍ମି
ତୁମରି ସ୍ପର୍ଶର ରାଗ ଅନୁରାଗେ
ଆବେଗର ଅନୁଗାମୀ
ତମ ଅଜଣାତେ ତମକୁ ସଜନୀ
କରିଛି ଜୀବନେ ସଙ୍ଗୀ ।
ଚଞ୍ଚଳା ତମେ ଚପଳାମତୀ ଗୋ
କଲେ କର ତିରସ୍କାର
ଅଶାନ୍ତ ତୁମରି ବେଳାଭୂମି ପରେ
ପ୍ରେମିକ ମୁଁ ଯାଯାବର
ତୁମରି ଛୁଆଁରେ ମରିବାକୁ ସଖି
ତୋଳେ ବାଲିର କବର ।
କେବେ ଯଦି କେହି ପ୍ରେମିକ ପ୍ରେମିକା
ବେଳାଭୂମି ପରେ ଆସି
ତୋଳିବେ ନଅର ପ୍ରୀତି ପ୍ରଣୟର
ବାଲିଖେଳେ ହସିହସି
ମଲା ଶାମୁକା ମୁଁ ଶୋଇଯିବି ତହିଁ
ତୁମରି ପ୍ରେମରେ ଝାସି ।
ପ୍ରେମିକ ଟେ କେହି ନିଶ୍ଚେ କହିବ
ଦେଖ ଦେଖ ଏ ଶାମୁକା
ଚିର ନିଦ୍ରାରେ ଶୋଇଛି ଏକଲା
ଉର୍ମିର ତ ନାହିଁ ଦେଖା
ଅଜବ ଏ ପ୍ରେମ ଆଗୋ ପ୍ରାଣସହୀ
ଦେବନି ଜୀବନେ ଧୋକା ।
ଫାଜିଲ ଓଠର ଚେନାଏ ହସରେ
ପାଇଯିବି ଜୀବନ୍ୟାସ
ଜୀବନ ତମାମ ପ୍ରତୀକ୍ଷାର ମୋର
ସେଦିନ ହୋଇବ ଶେଷ
ଫେନାୟିତ ତମ ପ୍ରୀତିର କବରୀ
କଲେ କରୁ ଉପହାସ ।
ବେଳାଭୂମି ସହ ସମ୍ପର୍କ ତୁମରି
ଏମିତି ଅତୁଟ ଥାଉ,
ତୁମରି ମିଳନ ପ୍ରତି ମୁହୂର୍ତ୍ତରେ
ମୂର୍ଚ୍ଛନା ଭରି ଦେଉ
ତୁମରି ପ୍ରେମରେ ଦେବଦାସ୍ ମୁଁ
ଏ ଜୀବନ ହଜିଯାଉ ।
ଶାମୁକାର ପ୍ରେମ ଚିର ଶାଶ୍ବତ
ଉର୍ମି ନ ବୁଝିଲେ ନାହିଁ
ଅନୁଭବ ଆଉ ଅନୁରାଗେ ମୋର
ଜୀବନ ମାରୁଛି ହାଇ
ପ୍ରେମୀ ଯୁଗଳଙ୍କ ଫାଜିଲ ହସରେ
ପ୍ରତାରଣା ଗୀତ ଗାଇ ।
