ମୁକ୍ତି ଦିଅ

ମିଛର ବାହାନା କଥାର ଛଳନା

ତମ କରିପାର ବୋଲି ,

              ବିଶ୍ବାସର ବିଷ ଛନ୍ଦ କପଟରେ

              ହାରିହାରି ଜିତିଗଲି ।

ମନ ଦର୍ପଣରେ ତମ ଛବି ଦେଖେ

ସ୍ମୃତିମୟ ଅତୀତର,

             ମନର ମାନସୀ ମୁକ୍ତ ବିହଙ୍ଗମ

             ମୁଁ ଯେ ଭିନ୍ନ ଯାଯାବର ।

ସମୟ କହିବ ସତ ମିଛ କଥା 

ନଥିବି ମୁଁ ତୁମଠାରେ,

               ସ୍ମୃତି ପରଶର ଝାପସା ଚିତ୍ର 

                ଗାଉଥିବ ଶୋକ ଭରେ।

ହଜିଲା ଅତୀତ ଫେରି କି ଆସିବ

ଗଲାଣି ତ କଥା ଗଲା,

              ଦୁଃଖ ନଈରେ ମୋ' ଫୁଟାଡଙ୍ଗାର

              ମାରୁଥିବି ମୁଁ ଆହୁଲା ।

ସତମିଛର କି ହିସାବ ଥିବ ଯେ 

ଦୋଷ ଦେବି ମୁଁ କାହାକୁ,

                ଆପଣା ଢଙ୍ଗରେ ବଞ୍ଚିବାକୁ ହେବ 

                ଭଲପାଇ ଆପଣାକୁ ।

ମୁକ୍ତିକାମୀ ମୁଁ ଯେ ମୁକ୍ତ ମଣିଷ

ଲୋଡା ନାହିଁ ଗୋ' ବନ୍ଧନ,

                ଜୀବନେ ମରଣେ ଦରଜର ସ୍ମୃତି

                 ବିଚଳିତ ତନୁ ମନ ।

ମୁକ୍ତି ଦିଅ ମୁକ୍ତି ଦିଅ ମୋତେ

                  ମୁକ୍ତି ଲୋଡା ବାକି ଜୀବନରେ,

ବଞ୍ଚିବି ମୁଁ ବଳକା ଆୟୁଷ

                 ମୋ' କବିତା ରାଗିଣୀର ସୁରେ ।।