ପରକାଳ

ବର୍ତ୍ତମାନ ଅଛି ଅତୀତ ତ ଥିଲା

ଭବିଷ୍ୟତ ବି ରହିବ ।

ଇହକାଳ ଏବେ ଭୋଗ ହେଉଅଛି

ପରକାଳ ତ ଆସିବ ।୧।

କାଳ ପ୍ରଭାବରୁ ମୁକ୍ତ ନୁହେଁ କେହି

କାଳ ହୁଏ ସର୍ବଗ୍ରାସୀ ।

ଦେଖ ବା ନଦେଖ ଯଥା ସମୟରେ

ପ୍ରବେଶ କରଇ ଆସି ।୨।

ଇହକାଳ ଯଦି ଆମେ ସୁଧାରିବା

ସୁଧୁରିବ ପରକାଳ ।

ଏହି ସମୟରେ ଇହକାଳେ ଅଛେ

କର୍ତ୍ତବ୍ଯ କର କେବଳ ।୩।

ନିରତ କରମ କରିବା ଆମର

ସ୍ବଧର୍ମରେ ଆମ ରହି ।

ଇହକାଳ ନିଶ୍ଚେ ମଧୁମୟ ହେବ

ପରକାଳ ଚିନ୍ତା ନାହିଁ ।୪।

ଯେଉଁ ବର୍ଣ୍ଣ ଅବା ଆଶ୍ରମରେ ଅଛେ

ନିଜ ଧର୍ମ କର୍ମ କରି ।

ଗୁରୁ ଗୁରୁଜନ ସଭିଙ୍କୁ ସମ୍ମାନ

ଦେଇ ଯିବା ଅପସରି  ।୫।

କର୍ମ ଫଳାସକ୍ତି ନରଖି ମନରେ

ସମର୍ପିବା ପ୍ରଭୁୁପଦେ ।

ସମଦର୍ଶୀ ହୋଇ ବିବେକ ଜଗାଇ

ବୈରାଗ୍ୟ ଲଭିବା ହୃଦେ ।୬।

ବୈରାଗ୍ୟରୁ ଜ୍ଞାନ ଭକତି ଲଭିଲେ

ପ୍ରାପ୍ତ ହେବ ପରା ଶାନ୍ତି ।

ପରକାଳ ଆମ ତେଜୋମୟ ହେବ

ଲଭିବା ଗତି ମୁକତି ।୭।

ଭକତର ମୁକ୍ତି ଇଛା ତ ନଥାଏ

ଚାହେଁ ସଦା ପ୍ରଭୁଙ୍କର ।

ପାଶେ ପାଶେ ନିତ୍ଯ ସହଚର ହୋଇ

କରିବ ସେବା ତାଙ୍କର ।୮।

ଗୁରୁ ବିଭୁ କୃପା ହେଲେ ତା ସମ୍ଭବ

ନିଜେ କଲେ ପୁରୁଷାର୍ଥ ।

ଇହକାଳ ଆମ ସୁଦିବ୍ୟ ହୋଇବ

ପରକାଳ ପରମାର୍ଥ ।୯।