ପ୍ରୀତି ଶତଦଳ

ଖୁସି ମନେ ତୁମେ ମୋ ଅଧରଛୁଇଁ

ଆଙ୍କିଦେଲେ ସରୁ ଚୁମା

କୂଳ ଲଙ୍ଘି ଯାଏ ପ୍ରେମର ତଟିନୀ

ହୃଦେ ଭରେ ସବୁଜିମା I

ତୁମରି ଓଠର ନରମ ପରଶେ

ମନ ତଳେ ଉଠେ ଝଡ

ଜୁଆରିଆ ହୁଏ ହୃଦୟ ସାଗର

ଭାଙ୍ଗେ ଧୈର୍ଯ୍ୟ ବନ୍ଧ ବାଡ I

ଆଖି ତଳେ ମୋର ରଖିଛି ଲୋ ସଖୀ

ତୁମରି ସୁନ୍ଦର ଛବି

ତୁମେ ମୋ ନିଃଶ୍ୱାସ ପ୍ରଶ୍ୱାସର ଗତି

ସଜାଇଛ ମୋତେ କବି I

ମନତଳେ ତୁମ ଆଙ୍କି ମୁଁ ଦେଇଛି

ନନ୍ଦନ ବନର ଶିରୀ

ତୁମେ ପ୍ରେମମୟୀ ହୃଦୟ ଈଶ୍ୱରୀ

ମୋ ମନର ନୀଳପରୀ I

ତୁମରି ଦେହରେ ଲେଖିବି ଲୋ ସଖୀ

ଜୀବନର ଚିତ୍ରଗୀତି

ତୁମରି ମଥାରେ ଢାଳୁଥିବି ସଦା

ମୋ ହୃଦୟ ଭରା ପ୍ରୀତି I