ପ୍ରେମରେ କଳଙ୍କ

ଅନାବିଳ ପ୍ରେମ କରୁଥିଲ ବୋଲି

କହୁଥିଲ କହ କିଆଁ ?

ଆବିଳତା ଏତେ ରଖିଥିଲ ମନେ

ପ୍ରେମରେ ଲାଗିଲା ନିଆଁ  ।

ଇଏ କେଉଁ କଥା ବିଶ୍ବାସରେ ବିଷ

ଦେଲ ତୁମେ କେଉଁପରି  ?

ଈଶ୍ବର ସୃଷ୍ଟିରେ ଅପ୍ରାକୃତ ପ୍ରେମ

କେହି ନୁହେଁ ପ୍ରେମ ସରି ।

ଉତ୍ପଳ ଦର୍ଶନେ ଜାଗେ ସିନା ପ୍ରେମ

ଉପଳ କି ତା'ର ତୁଲ ?

ଊଣା ନୁହେଁ କେବେ ମଧୂପର ପ୍ରେମ

ଜୀବନ ତା' ମଣେ ସଲ ।

ଓର ଉଣ୍ଡି ଯାଇ ମଧୁ ଗନ୍ଧ ପାଇ

ମଧୁ ଆସ୍ବାଦନ କରି ।

ହାରଇ ଜୀବନ ମୁଦ୍ରିତ ପଙ୍କଜେ

ତା ପ୍ରେମ କି ପାରେ ମରି ।

ପ୍ରେମ ସମ ସୁଧା ଦୁର୍ଲଭ ଜଗତେ

ଏ କଥା ନଜାଣେ କିଏ ?

ଅକଳଙ୍କ ପ୍ରେମେ କଳଙ୍କ ବୋଳିଲ

ଜନରବ ହାଏ ହାଏ  ।

କଳଙ୍କିନୀ କେହି ବୋଲନ୍ତି ରାଧାକୁ

ସେ ତ ପ୍ରେମ କାଙ୍ଗାଳୁଣୀ ।

ଅଦ୍ୱୈତ ଅଖଣ୍ଡ ପୀରତିର ଧାରା

ସେ କି ପ୍ରେମ କଳଙ୍କିନୀ ।

ଅକଳଙ୍କ ଥିଲା ଗୋପିକାଙ୍କ ପ୍ରେମ

ନ ଜାଣିଛି କହ କିଏ  ?

ପ୍ରେମରେ କଳଙ୍କ ବୋଳି କେଉଁ ଲାଭ

ପାଇଲ କହ ଟିକିଏ ?