ପ୍ରଦୋଷ ପ୍ରାଙ୍ଗଣେ
ପ୍ରଦୋଷ ପ୍ରାଙ୍ଗଣେ
ପଲ୍ଲୀ ଅପରାହ୍ନ ରଶ୍ମି ଯେ ସୁବର୍ଣ୍ଣ
ଚୌଦିଗେ ସିଞ୍ଚି ପଢିଛି ,
ଧିରେ ଯେ ତପନ ବିଦାୟ ପ୍ରସ୍ତୁତି
ପଲ୍ଲୀରେ ସୁନ୍ଦର ଭରିଛି...।।
ବିଦ୍ୟା ସାରି ପିଲେ ଫେରନ୍ତି ଆନନ୍ଦେ
ସର୍ବେ ଗୃହ ମୁଖ ହୋଇ '
ଚଞ୍ଚଳତା ପୂର୍ଣ୍ଣ ଉଲ୍ଲାସକ ମନ
ଅସ୍ଥିର ଚିତ୍ତରେ ଧାଇଁ.... ।।
ଖେଳ ପାଇଁ ମନ ହେଲାଣି ଅଧିର
ବେଳ ଉଚ୍ଛୁର ଯେ ନୋହୁଁ '
ଆସ ସାଙ୍ଗ ମୋର ଖେଳିବା ଯେ ଖେଳ
ନାନା ବିଧ ଖେଳ ତହୁଁ...।।
ଘଡିଏ ଖେଳିଣ ସର୍ବେ ପିଲା ଗଣ
ନିଜସ୍ଵ ବସାକୁ ବେଗି '
ପଶ୍ଚିମ ଆକାଶ ପର୍ବତ ର ଶୀର୍ଷେ
ସିନ୍ଦୂରି ସୂରୁଜ ଦେଖି.... ।।
ଖଗ ଗୁଚ୍ଛ ଗୁଚ୍ଛ ବସା କୁ ଫେରନ୍ତି
ପ୍ରଦୋଷ ର ଆଗମନେ '
ସିନ୍ଦୁରି ସୂରୁଜ ଧିରେ ଧିରେ କରି
ଲୁଚେ ପର୍ବତର କୋଣେ.... ।।
ଚଷା ଭାଇ ମୋର ମୁଣ୍ଡରେ ପଗଡି
ହସ୍ତେ ଚଷା ଅସ୍ତ୍ର ଧରି '
ଫେରନ୍ତି ପ୍ରଦୋଷେ ଘର ମୁହାଁ ହୋଇ
କେତେ ପରିଶ୍ରମ କରି ..... ।।
ନବ ବଧୂ ପୁଣି ଦୀପ୍ତଟିଏ ଆଣି
ବୃନ୍ଦାବତୀ ପାଶେ ଥୋଇ '
ମୁଣ୍ଡିଆଟେ ମାରି ପ୍ରାର୍ଥନା ଯେ କରି
ଶୁଭାକାଂକ୍ଷୀ ଯେ ସେହି.... ।।
ଗୋରୁ ମାଳ ମାଳ ଧୂଳି ଉଡାଇଣ
ଗାଆଁ ଦାଣ୍ଡେ ଠୁଳ ହୋଇ. '
ହମ୍ବାରଡ଼ି କରି ବାହୁଡନ୍ତି ସେହି
ସନ୍ଧ୍ୟାର ଗମନ ପାଇଁ.... ।।
ପୂରୁବ ଆକାଶେ ଯହ୍ନ ପୁନଃ ଦିଶେ
ଉଦୟର ରଶ୍ମି ଆଣି '
ସନ୍ଧ୍ୟା ତାରା ପୁଣି ହସି ହସି କରି
ସ୍ୱାଗତର ପୁଷ୍ପ ଢାଳି.... ।।
ବିଞ୍ଚି ହୋଇ ପଡେ ତାରକା ଭଣ୍ଡାର
ଅମ୍ବର ବକ୍ଷକୁ ଚିରି '
ମିଞ୍ଜି ମିଞ୍ଜି ହୋଇ ବାଦଲ ସଙ୍ଗରେ
ଲୁଚକାଳି କ୍ରୀଡା କରି...।।
ପ୍ରଦୋଷ ପ୍ରାଙ୍ଗଣେ ପ୍ରକୃତି ବଖାଣେ
କେତେ ନବ କାର୍ଯ୍ୟ ମାନ '
ସରବେ ଉତ୍ସୁକ ମନେ ଶାନ୍ତ ତାଙ୍କ
ଶାନ୍ତ ରାତ୍ରେ ବିଦ୍ୟମାନ..... ।।