ପ୍ରଭୁ ଶ୍ରୀରାମେଶ୍ଵର

ଉତ୍ତରେ ବଦ୍ରିକା, ପଶ୍ଚିମେ ଦ୍ଵାରକା,

ପୂର୍ବେ ଜଗନ୍ନାଥ ଧାମ l

ଦକ୍ଷିଣେ ଥାପିଲେ ଶ୍ରୀରାମେଶ୍ୱରଙ୍କୁ

ତ୍ରେତୟା ଯୁଗେ ଶ୍ରୀରାମ ll

ଚତୁର୍ଦିଗେ ଚତୁର୍ଧାମ ବିରାଜଇ ଏ

ଆର୍ଯ୍ୟ ଭାରତ ବର୍ଷ l

ତିନି ଧାମ ଅଟେ ଶ୍ରୀବିଷ୍ଣୁଙ୍କ କ୍ଷେତ୍ର

ଦକ୍ଷିଣରେ ଆଶୁତୋଷ ll

ବଦ୍ରିକାରେ ପ୍ରଭୁ ତପ ଯୋଗ ସାଧି ରାମେଶ୍ୱରମରେ ସ୍ନାନ l

ଶ୍ରୀକ୍ଷେତ୍ର ଧାମରେ ଭୋଜନ ପ୍ରଭୁଙ୍କ ଦ୍ୱାରକାପୁରେ ଶୟନ ll

ବିଶ୍ରବାଙ୍କ ସୂତ ମହା ବଳବନ୍ତ

ମହାଜ୍ଞାନୀ ବ୍ରହ୍ମବେତ୍ତା l

ରାବଣ ନିଧନେ କୋଦଣ୍ଡଧାରୀଙ୍କ

ବଢ଼ି ଗଲା ବଡ଼ ଚିନ୍ତା ll

ବ୍ରାହ୍ମଣ ମାରିଲି ବ୍ରହ୍ମହତ୍ୟା କଲି

ପାତକେ ହୋଇଲି ଭାଗୀ l

ଭୋଳା ଶଙ୍କରଙ୍କୁ ପ୍ରତିଷ୍ଠା କରିବି

ହେବି ଶିବ ଅନୁରାଗୀ ll

ଏମନ୍ତ ବିଚାରି ପ୍ରଭୁ ଧନୁର୍ଦ୍ଧାରୀ

କଲେ ବଡ଼ ଆୟୋଜନ l

ହିମାଳୟୁ ଶିବଲିଙ୍ଗ ଘେନି ଆସ

ନିର୍ଦ୍ଦେଶିଲେ ହନୁମାନ ll

ଶୁଭବେଳା ଏବେ ଗଡ଼ି ଯାଉଅଛି

ହନୁ ଆସେ ନାହିଁ ଫେରି l

ବାଲୁକା ଲିଙ୍ଗଟେ ଗଢ଼ି ରଖିଦେଲେ

ମାଆ ଜନକ କୁମାରୀ ll

କୌଶଲ୍ୟା ନନ୍ଦନ ସେ ଲିଙ୍ଗ ପୂଜିଲେ

ନାମ ହେଲା ରାମେଶ୍ୱର l

ପବନ ନନ୍ଦନ ଲିଙ୍ଗ ଆଣିଥିଲେ ନାମ

ମୁଖ ଲିଙ୍ଗେଶ୍ୱର ll

ପ୍ରଭୁ ରାମଚନ୍ଦ୍ର ବାର୍ତ୍ତା ଦେଲେ ପୁଣି

ଯେ ପୂଜିବ ରାମେଶ୍ୱର l

ବିଷ୍ଣୁ ଶିବ କ୍ଷେତ୍ର ମରତେ ବିଖ୍ୟାତ

ସିଧା ଲଭିବ ମୋ ପୁର ll

ରାମାୟଣ ଯୁଗ କିର୍ତ୍ତୀ ସେତୁବନ୍ଧେ

ସିନ୍ଧୁ ତଟେ ରାମେଶ୍ୱର l

ପ୍ରଭୁ ଆଶୁତୋଷ ଲଭିବେ ସନ୍ତୋଷ

କର ତାଙ୍କୁ ନମସ୍କାର ll