ଫୁଲ ବଉଳବେଣୀ
ଫୁଲ ବଉଳବେଣୀ
କୁଆଁର ପୂନେଇ ଜହ୍ନ ଗୋ ଫୁଲ ବଉଳବେଣୀ
କୁଆଁରୀ ମାନଙ୍କ ବଡ଼ ପରବକୁ
ହେବା ଆସ ସଜବାଜ ଗୋ
ସୁନା ଭଉଣୀ ।
ପୂଜା ଥାଳି ଧରି ଆସିବ ମିତଣୀ
ଫଳ ପୁଷ୍ପ ଖଇ ଗୁଆ
ଟେକିବା ଅଞ୍ଜଳି ସୂରୁଜ ଦେବଙ୍କୁ
ଭାଙ୍ଗିବା ଶୁଭ ନଡ଼ିଆ
ମନେ ମନେ ହେବା ଗୁଣି
ଇନ୍ଦୁ ପୂର୍ଣ୍ଣିମାର ଶୁଭ ଜହ୍ନି ଓଷା
ଭାଦ୍ରବ ମାସରେ ଜାଣି ।
କୁଆଁର ପୂନେଇ ଜହ୍ନ ଗୋ
ମୁହଁ ସଞ୍ଜ ବେଳେ ଚଉରା ମୂଳରେ
ଚାଉଳ ପିଠଉ ନେଇ
ଜହ୍ନି ଫୁଲେ କୋଠି ତିଆରି କରିବା
ଶୁଭ କଳସ ବସାଇ
ଉଇଲେ ଶରଦ ଶଶୀ
ମନ ଆନନ୍ଦରେ ଗାଇବା ମିଶିକି
ମିତଣୀ ବଉଳବେଣୀ ।
କୁଆଁର ପୂନେଇ ଜହ୍ନ ଗୋ
କୁଆଁର ପୂନେଇ ଜହ୍ନ ଷୋଳକଳା
ସୁନ୍ଦର ଶୀତଳ ପୂର୍ଣ୍ଣ
ସାକ୍ଷାତ କୁମାର ଦେବ କାର୍ତ୍ତିକେୟ
ପ୍ରେମମୟ ଶିରୀ କୃଷ୍ଣ
ତାଙ୍କ ରୂପ ମନେ ଚିନ୍ତି
ଅରପିବା ଅର୍ଘ୍ୟ ପୂଜାର ନୈବେଦ୍ୟ
କାମନା ହୋଇବ ସିଦ୍ଧି ।
କୁଆଁର ପୂନେଇ ଜହ୍ନ ଗୋ
ହୁଏ ଛନ୍ନ ଛନ୍ନ କୁଆଁରୀଙ୍କ ମନ
ରାତି ହୋଇ ଉଜାଗର
ମାତିଯିବା ପୁଚି ଲୁଚକାଳି ଖେଳେ
ସଙ୍ଗୀତ ନୃତ୍ୟ ଆସର
ସକାଳୁ ଗାଧୋଇ ସାରି
ଖୋଜିବା ପାଣିରୁ ମଙ୍ଗଳ ସଙ୍କେତ
ମନସ୍କାମ ଯିବ ପୂରି ।
କୁଆଁର ପୂନେଇ ଜହ୍ନ ଗୋ