ଫଗୁଣ ଫଗୁଣ ବାସୁଛି

ଅୟୁତ ଫୁଲରେ ଦେହକୁ ସଜେଇ ଆସିଛି ରେ ଆଜି ଫଗୁଣ,

ଅୟୁତ ମନରେ ପୁଲକ ଭରିସେ ଖୁସି ଆଣି ଅଛି ଦିଗୁଣ ।

ସବୁଜ ବନାନୀ ରଙ୍ଗମୟ ଆଜି ଇନ୍ଦ୍ରଧନୁ ର ଛଟା ରେ,

ମଳୟ ପବନେ ଉକୁଟେ ମହକ ସତେକି ଜୁଆରଭଟ୍ଟାରେ ।

ଚୁତଡାଳ ଏବେ ବଉଳରେ ଭରା ଶୁଭୁଛି ମଧୁପ ଗୁଞ୍ଜନ,

ଅଳି ହୋଇ ମେଳି କରୁଛନ୍ତି କଳି ଦେବାକୁ ତାହାରେ ଚୁମ୍ବନ ।

ଗଛରେ ଗଛରେ ପଲ୍ଲବୀ ଉଠିଛି ସବୁଜ କଅଁଳ ପତର,

ଫଗୁଣ ର ଶୋଭା ଦେଖି ମନଲୋଭା ଅଟକି ଯାଉଛି ନଜର ।

ଶିମିଳି,ପଳାସ ରଙ୍ଗ ଅବିରରେ ଫଗୁଣ କୁ କରେ ସ୍ୱାଗତ,

ଚାମେଲି ଖୋଲିତା ରୂପ ର ପସରା କରୁଛି ସଭିଙ୍କୁ ଉଷତ ।

ଆକାଶ ଦିଶୁଛି ଭାରି ନିରିମଳ ନିଳୀମା ତା ମନ ମୋହୁଛି,

ତୋଫା ଆକାଶରେ ତୋଫା ଜହ୍ନ ଏବେ ରାତିରେ ଦିହୁଡି ଜାଳୁଛି ।

ଜଳ ନିରିମଳ,ସ୍ଥଳ ନିରିମଳ, ଆକାଶ ବି ତୋଫା ଦିଶୁଛି,

ଯୁଆଡ଼େ ଚାହିଁଲେ ସିଆଡେ କେବଳ ଫଗୁଣ ଫଗୁଣ ବାସୁଛି ।