ଖରା ଆସିଲାଣି ମାଡ଼ି
ଖରା ଆସିଲାଣି ମାଡ଼ି
ଆସିଲା ଆସିଲା ଆସିଲା ଖରା,
ତାତିଲା ତାତିଲା ତାତିଲା ଧରା,
ଗମ୍ ଗମ୍ ବହେ ଝାଳ,
ତାତିଲା ଖରାରେ ଚାଲି ହେଉନାହିଁ ବାଟୋଇଟି କଲଵଲ ।
ଶୁଖିଲା ଶୁଖିଲା ଶୁଖିଲା ପାଣି,
ନଈନାଳ ଫାଟି ଆଁ କଲାଣି,
ଜଳଜୀବ କଲବଲ,
ନଳକୂପ ପାଖେ ଲାଗିଛି ଧାଡି ପାଇବାକୁ ଟୋପେ ଜଳ ।
ଚା ଆଡେ ଚାହିଁ ମୁହଁ କୁ ମୋଡି
ପଇଡ କହୁଛି ହଲାଇ ତୋଡି
କହିଲୁ କହିଲୁ ମୋତେ,
କାହା ପଲା ଭାରି ରହିଛି ଏବେ କାହାର ଆଦର କେତେ ?
ଚା କହୁଅଛି ତାହାକୁ ଚାହିଁ,
ଦେଖାନା ଏତେଲୋ ଚାତର ତୂହି
ହୁଅନାତୁ ରାଉରାଉ,
ଭାଉ ମୋର କେତେ ଜାଣିବୁ ରହ ଆଉ କିଛି ଦିନ ଯାଉ ।
ପଙ୍ଖା,କୁଲର ଓ AC ତ ମିଳି,
ସବୁଘରେ ଏବେ ରାଜ୍ କଲେଣି,
ବଢିଲା ତାଙ୍କର ଭାଉ,
ତାଙ୍କୁ ଛାଡି ଦଣ୍ଡେ ରହିହେଉନି ବିଲ୍ ପଛେ ଯେତେ ଯାଉ ।
ତବତ ପଡ଼ିଛି ମୁହଁ କୁ ମାଡି,
ପଖାଳ ହସୁଛି ଖିଲି ଖିଲି
ଶାଗଭଜା, ବଡ଼ିଚୁରା,
ଭାରିଭଲ ଲାଗେ ପାଖରେ ଥିଲେ ଆଳୁପୋଡା ଦହିବରା ।
ଆମ୍ବ, ତରଭୁଜ,ପଣସ,ତାଳ,
ବଜାର ରେ ଆସି ହେଲେ ଣି ଠୁଳ,
ସପୁରୀ ଓ ଜାମୁରୋଲ୍,
ଲିଚୁ ସହ ମିଶି ସାରା ବଜାର କୁ କରିଲେଣି ହୁଲୁସ୍ତୁଲ୍ ।
ପରବ ଆସୁଛି ଧାଡି କି ଧାଡି
ଅକ୍ଷୟ ତୃତୀୟା ଚନ୍ଦନ ପାଳି,
ସାବିତ୍ରୀ ପଛକୁ ରଜ,
ଏବେଠାରୁ ଝିଅ ଯୋଜନା କଲେଣି କେମିତି ହୋଇବେ ସଜ ।
ଖରାକୁ ତାଙ୍କର ଖାତିରି ନାହିଁ,
ବଉଳ କହୁଛି ମଲ୍ଲି କୁ ଚାହିଁ
କହିଲୁ କହିଲୁ ସାଙ୍ଗ,
ଖରା ଦେଖି ଆମେ ଡରିଛେ କି କେବେ ଫିକା ହୋଇଛି କି ରଙ୍ଗ ?
ଗ୍ରୀଷମଟା ଭାରି ବିଷମ ସିନା,
ଜଳ ଟାଣି କରେ ମେଘକୁ ଜମା,
ତାହାଲାଗି ପାଉ ପାଣି,
ଖରା ନହୋଇଲେ ହେବନି ବର୍ଷା ଏକଥାଟି ଥାଅ ଜାଣି ।