ଦୀପାବଳି

ଅସରାଖୁସିର ପସରାକୁ ନେଇ

              ଆସିଛିରେ ଦୀପାବଳୀ,

ଦୁର୍ଗା ଚାଲିଗଲେ,ଗଜଲକ୍ଷ୍ମୀ ଗଲେ

               ଆସୁଛନ୍ତି ଏବେ କାଳୀ ।

ପୁରାଣ କହଇ ଏହିଦିନ ପ୍ରଭୂ

               ସାରିତାଙ୍କ ବନବାସ,

ରାବଣକୁମାରି ସୀତାଙ୍କୁ ଉଦ୍ଧାରି

              ଫେରିଥିଲେ ନିଜ ଦେଶ ।

ପ୍ରଭୂଙ୍କୁ ସ୍ୱାଗତ କରିବାପାଇଁକି

                ପ୍ରଜାମାନେ ଦୀପଜାଳି,

ନଗରୀକୁ କରି ଆଲୋକେ ସଜ୍ଜିତ

              ପାଳିଥିଲେ ଦୀପାବଳୀ ।

ସେହି ସ୍ମୃତି ଧରି ଆଜିବି ଆସୁଛି

              ବରଷକେ ଦୀପାବଳୀ,

ସବୁଲୋକ ଘର ସଜାଇଥାଆନ୍ତି

               ନବବଧୂଟିଏ ପରି ।

ପିତୃପୁରୁଷଙ୍କୁ ଏହିଦିବସରେ

                 ଶ୍ରଦ୍ଧାରେ ଦିଅନ୍ତି ଶ୍ରାଦ୍ଧ,

ଜୀବନ ହୁଅଇ ସରଳ ସୁଗମ

                ଲଭିତାଙ୍କ ଆଶୀର୍ବାଦ ।

ସଞ୍ଜ ନଇଁଗଲେ କାଉଁରିଆ ଜାଳି

              ବଡବଡୁଆଙ୍କୁ ଡାକୁ,

କେତେମିଠା,ପିଠା ପୂଜାକରି ଘରେ

              ସାଇପଡିଶାଙ୍କୁ ବାଣ୍ଟୁ ।

କେତେ ସୁନ୍ଦର ଏ ପରମ୍ପରା ଆମ

              ବଡଙ୍କୁ ସମ୍ମାନ ଦେବା,

କରିବାନି ୟାର ଅପବ୍ୟବହାର

               ସଦା ମାନି ଚଳୁଥିବା ।

ବର୍ଷାଦିନେ ବହୁ ପୋକ ଜନ୍ମି ଥାନ୍ତି

               ଦୀପର ନିଆଁରେ ପୋଡି,

ପାଳିଲେ ଏପର୍ବ ମରନ୍ତି ସେମାନେ

             ଦୀପର ନିଆଁରେ ପଡି ।

ଏବେ କିନ୍ତୁ ଆଉ ମାଟିଦୀପନାହିଁ

              ବିଜୁଳିର ଦୀପଜଳେ,

ମରନ୍ତିନି ପୋକ ବିଜୁଳିଆଲୋକେ

            ତାଙ୍କ ପ୍ରାଦୁର୍ଭାବ ବଢ଼େ ।

ଆଜିକାଲି ଆଉ ଦୀପାବଳୀପର୍ବେ

             ଆଗପରି ମଜାନାହିଁ,

ବାଣଫୁଟା ଏବେ ମୁଖ୍ୟ ଆକର୍ଷଣ

             ଦୀପଆଉମୁଖ୍ୟ ନାହିଁ ।

ବାରୁଦ ଧୁଆଁରେ ପ୍ରଦୁଷିତ ହୁଏ

               ବାୟୁମଣ୍ଡଳର ମାତ୍ରା,

ନାନାରୋଗ ଡାକି ଦୁର୍ବିସହ କରେ

              ଆମର ଜୀବନଯାତ୍ରା ।

ଆଲୋକର ପର୍ବ ଦୀପାବଳୀ ଏଯେ

            ଆଲୋକେ ପାଳିତ ହେଉ,

ଆତସବାଜିର ପ୍ରତିଯୋଗିତାରେ

            ବାୟୁ ଦୂଷିତ ନ ହେଉ ।