ଫଗୁଣ ଖୋଜୁଛି ଠିକଣା ତା'ର
ଫଗୁଣ ଖୋଜୁଛି ଠିକଣା ତା'ର
ଚତୁଃର୍ଦିଗ ଆଜି ସବୁଜ ଶ୍ୟାମଳ
ଆମ୍ବ ବଉଳର ହସେ,
ଧରଣୀ ରାଣୀଟି ନାନା ପୁଷ୍ପେ ଆଜି
ସୁନ୍ଦରୀ ତରୁଣୀ ଦିଶେ |
ଶୀତର ଲହରୀ ରୁଷି ଚାଲିଗଲା
ବସନ୍ତର ଆଗମନେ,
ଫଗୁଣର ଫଗୁ ରଙ୍ଗେଇବା ପାଇଁ
ଅଙ୍କୁରିତ ଧରା ଧାମେ |
ରଙ୍ଗ ବେରଙ୍ଗର ପ୍ରସ୍ଫୁଟିତ ଫୁଲେ
ଫୁଲେଇ ପରଜାପତି,
ମଳୟ ପବନ ଲଗାଇ ଦହନ
ଜଳାଏ ପ୍ରେମିକ ଛାତି |
ରଙ୍ଗୀନ ସ୍ୱପ୍ନରେ ଭିଜିଯାଏ ମନ
ଶୁଭେ କାକଳିର ସ୍ୱର,
ପ୍ରତିଧ୍ୱନି ଆସେ ବାସ୍ତବତା ଦିଶେ
ପ୍ରତିଛାୟା ଏ କାହାର |
ଋତୁଚକ୍ର ତୁମେ ବହିନେଇଗଲ
ପାଞ୍ଚ ଋତୁ ଅନୁପ୍ରାଣେ ,
ବସନ୍ତ ପାଇଁକି ଠିକଣା ହଜିଛି
ଖୋଜୁଛି ସେ ପ୍ରତିକ୍ଷଣେ |
ଆମ୍ବ ବଉଳରେ ଅଛି କି ତା ନାମ
ଅଛି କି ପୁଷ୍ପର ବାସେ,
କୋଇଲି ସୁର କି ଦିଏ ତା ବାରତା
ଅବା ପ୍ରେମିକାର ହସେ|
ପାଉନି ଠିକଣା କରେ ମନଊଣା
ଫୁଲେଇ ଫଗୁଣ ଆଜି,
ସତେ କି ତା ଫଗୁ ହେଲା ବାଟବଣା
ପାଉନାହିଁ ରାସ୍ତା ଖୋଜି |
ଦେଖାଇ ଦିଅହେ ବତାଇତ ଦିଅ
ଜାଣିଛ ଠିକଣା ଯଦି,
ସୁରୁଜ କିରଣେ ସ୍ୱାଗତ ଜଣାଏ
ଫଗୁଣର ପ୍ରୀତିଛନ୍ଦି |
ବରଷି ଦିଅହେ ଉତ୍ତରର ବର୍ଷା
ମନର ଜ୍ୱଳନ ଥମୁ,
ଆଶା ପାରିଜାତ ବାସ୍ନା ବିମୋହିତ
ଫଗୁଣକୁ ମିଳୁ ଛାମୁ |