ଓଠତଳ ହସ
ଓଠତଳ ହସ
ପ୍ରିୟା ଓଠତଳ ମୋନାଲିସା ହସ
ମନେ ରହିଯାଏ ଲାଖି
ଭୁଲିପାରେ ନାହିଁ ପ୍ରେମିକ ପ୍ରବର
ସପନେ ଭରଇ ଆଖି ।
ଖୋଜଇ ନିଜକୁ ପ୍ରିୟାର ଆଖିରେ
କାୟା ପଛେ ହୋଇ ଛାୟା
ହଜାଏ ନିଜକୁ ଅନ୍ଧାର ଭିତରେ
ବାସେ ମହମହ ମାୟା ।
ଦୁଇ ଦେହ ଭିନ୍ନ ମିଶି ହୋଇଯାଏ
ଏକମନ ଏକ ପ୍ରାଣ
ଓଠତଳ ହସ କିଣି ନିଏ ମନ
ବାନ୍ଧଇ ଦୃଢ଼ ବନ୍ଧନ ।
ଓଠତଳ ହସ କୁହୁକ ବଳରେ
ପର ଆପଣାର ହୁଏ
ଜାଳିଦିଏ କେବେ ହୃଦୟ ମନକୁ
କୀଟ ପ୍ରାଣ ଝାସିଦିଏ ।
ମୋହିନୀ କନ୍ୟାର ଓଠତଳ ହସେ
ରହସ୍ୟ ଲୁଚିକି ଥାଏ
ଆସ୍ୱାଦେ ଦେବତା ଅମୃତ ପ୍ରେମକୁ
ଭ୍ରମିତ ଅସୁର ହୁଏ ।