Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Santosh Kumar Nayak

Abstract Children Stories Classics

4.2  

Santosh Kumar Nayak

Abstract Children Stories Classics

ଓଡିଆ ସାହିତ୍ୟ କଥା

ଓଡିଆ ସାହିତ୍ୟ କଥା

1 min
400


ବାପରେ ଶୁଣ ତୁ କହୁଛି ବୁଝାଇ

ଓଡିଆ ସାହିତ୍ୟ କଥା,

ତୋ ପୂର୍ବପୁରୁଷ ଲେଖି ଯାଇଛନ୍ତି

ଓଡିଆରେ ଯେଉଁ ଗାଥା ।


ମାଟି ମହାକବି ସାରଳା ଦାସ ଯେ

ତୋର ପଣିଜେଜେ ହେବେ,

ତାଙ୍କ ହାତଲେଖା ମହାଭାରତକୁ

ଭୁଲିବୁ ନାହିଁ ତୁ କେବେ ।


ମାର୍କଣ୍ଡ ଦାସଙ୍କ କେଶବ କୋଇଲି

ବତ୍ସାଦାସ ଚଉତିଶା,

ପଢିଲେ ଜାଣିବୁ ଗଣ୍ଠିଧନ ମୋର

ଜୀବନର ଅଭିଳାଷା ।


ଜଗନ୍ନାଥ ଦାସ ଭାଗବତ ଆଉ

ବଳରାମ ରାମାୟଣ,

ସରସେ ବୁଝାନ୍ତି ସର୍ବସୁଖ ମିଳେ

ମନକୁ କରିଲେ ଟାଣ ।


ଅଚ୍ୟୁତାନନ୍ଦଙ୍କ ମାଳିକା ଶୁଣାଏ

କଳିଯୁଗ ପରିଣାମ,

ଯଶୋବନ୍ତ ଟୀକା ଗୋବିନ୍ଦଚନ୍ଦର

ଭଜୁକିନା ରାମନାମ ।


ଅନନ୍ତ ଦାସଙ୍କ କୃତିମଧ୍ୟେ ସାର

ହେତୁମୟ ଭାଗବତ,

ଜୀବନ ଦର୍ଶନ ପରମାତ୍ମା ଜ୍ଞାନ

ସୁଲଳିତେ ବିରଚିତ ।


ଉପେନ୍ଦ୍ର ଭଞ୍ଜଙ୍କ ବ' ବର୍ଣ୍ଣେ ରଚିତ

ବୈଦେହୀଶ ବିଳାସ ଯେ

ରାମାୟଣ କଥା ପଢି ପଢି ନିତି

ମନରେ ତାହାଙ୍କୁ ହେଜେ ।


ବଳଦେବଙ୍କର ଚନ୍ଦ୍ରାନନ୍ଦ ଚମ୍ପୂ

ଅଭିମନ୍ୟୁ ଚିନ୍ତାମଣି,

ରୀତିଯୁଗକବି କାବ୍ୟକବିତାର

ସଂଖ୍ୟା ପାରିବୁନି ଗଣି।


ରାଧାନାଥଙ୍କର ନନ୍ଦିକେଶ୍ବରୀ ବା

ଚିଲିକା କି ଚନ୍ଦ୍ରଭାଗା,

ବିରହ ବେଦନା ପ୍ରକୃତି ବର୍ଣ୍ଣନା

ପ୍ରତି କାବ୍ୟେ ତାଙ୍କ ଉଭା ।


ସତ୍ୟବାଦୀ ପରା ଦେଶାତ୍ମବୋଧକ

କବିତା ଲେଖାର ଯୁଗ,

ଗୋପବନ୍ଧୁ ଦାସ ହରିହର ଆଉ

ଗୋଦାବରୀଶ ଯେ ଆଗ ।


ଦେଶବାସୀ ପାଇଁ କାମ କରି ସଦା

ରଖିବୁ ଦେଶର ମାନ

ଲୋଡା ହେଲେ ତୁହି ମାଟି ମାଆ ପାଇଁ

ଦେବୁ ଆତ୍ମ ବଳୀଦାନ ।


ଫକୀର ମୋହନ ମାମୁଁ ଲଛମା ବା

ସମାଜ ସଂସ୍କାର ପାଠ

ଗୋପୀନାଥଙ୍କର ମାଟିମଟାଳ ଯେ

ପାଇଥିଲା ଜ୍ଞାନପୀଠ ।


ଅଛି ତ ଅନେକ ଏଇତ ଝଲକ

କହଲି ବଖାଣି ସୁନା,

ଓଡିଆ ଭାଷାକୁ ଭଲ ପାଇବୁ ତୁ

କରିବୁନି କେବେ ମନା ।


ଓଡିଆ ବୋଲି ତୁ ଗରବ କରିବୁ

ଚାଲିବୁ ଟେକି ତୋ ମଥା

ଭାଷା ସାହିତ୍ୟକୁ ଭଲ ତୁ ପାଇଲେ

ହୋଇବୁ ଜଗତଜିତା।


Rate this content
Log in