ନୂଆ ବରଷର ନବ ପୁଲକ

ପାହିଲାଣି ନିଶି          ପ୍ରାତ ହେଲା ଆସି 

        ସୂରୁଜ ଗଲେଣି ଉଇଁ 

ନୂଆ ବରଷର           ନବାରୁଣେ ଆଜି 

        ଉଦ୍ଭାସିତ ଏଇ ଭୂଇଁ l

ବନ ଉପବନେ          ସରିତ କାନନେ 

         ଝଲସଇ ନବ ପ୍ରଭା 

ନବ ରବି କର          ପାଇଣ ଭୂଧର 

        ବଢାଏ ତାହାର ଶୋଭା l

ବିଟପୀ ଡାଳରେ         ଖେଚେର ବସିଣ 

         ଗାଇଲେଣି ନବଗୀତି 

ନୂଆ ବରଷର           ନବ ପୁଲକରେ 

         ସଭିଏଁ ଗଲେଣି ମାତି l

ନୂଆ ସମ୍ଭାବନା          ନୂଆ ଆଶା ନେଇ 

        ସଜେଇ ହେଲାଣି ଧରା

ଉଜୁଡା ଅତୀତ          ହୁଅଇ ପ୍ରତୀତ 

         ସଜାଡି ହେବାକୁ ପରା l

ଅସୁମାରୀ ଆଶା         ସୀମାହୀନ ସ୍ବପ୍ନ 

          ଅନ୍ତରର ଅଭିଳାଷ 

ଆଉଥରେ ପୁଣି          ଗଢିବାକୁ ହେବ 

         ଦେଇ ତାକୁ ନବ ସ୍ପର୍ଶ l

ନିଜ ସାମର୍ଥ୍ୟରେ         ସ୍ବପ୍ନର ସୌଧକୁ 

          ଗଢିବାକୁ ହେବ ପୁଣି 

ନବ ସଂକଳ୍ପରେ          ନବ ଚେତନାରେ 

         ନବ ଉନ୍ମାଦନା ଆଣି l

ନୂଆ ବରଷର           ପହିଲି ସୂରୁଜ 

         ଅଜସ୍ର ପୁଲକ ଆଣୁ 

ସଭିଙ୍କ ଜୀବନେ         ଏ ମଧୁ ଲଗନେ 

         ଆଶାର ମୁରୁଜ ବୁଣୁ l