Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

Sarojini Mishra

Classics

4  

Sarojini Mishra

Classics

ତୁମେ ରାମ ତୁମେ ଶ୍ୟାମ

ତୁମେ ରାମ ତୁମେ ଶ୍ୟାମ

2 mins
372



ତୁମେ ଅଟ ରାମ ତୁମେ ଅଟ କୃଷ୍ଣ

ତୁମେ ଯେ ପ୍ରଜ୍ଞା ପୁରୁଷ

ଯୁଗର ଆହ୍ଵାନେ ଅବତାର ନେଲ

ଦେଲ ସ୍ଵତନ୍ତ୍ର ସନ୍ଦେଶ ।

ରାମ ଅବତାରେ ମର୍ଯ୍ୟାଦାର ସେତୁ

ତୁମେ ଯେ ସ୍ଥାପନା କଲ

କୃଷ୍ଣ ଅବତାରେ ଅପ୍ରାକୃତ ପ୍ରେମ

ମାଧୁରୀ ଖେଳାଇ ଦେଲ ।

ତୁମେ ଅଟ ରାମ ସତ୍ୟର ପୂଜାରୀ

ସତ୍ୟ ପାଇଁ ବନେ ଗଲ

କୃଷ୍ଣ ଅବତାରେ ଧର୍ମ ରକ୍ଷା କରି

ରଥେ ସାରଥି ହୋଇଲ ।

ତୁମେ ଅଟ ରାମ ତୁମେ ପରଂବ୍ରହ୍ମ

ସଭ୍ୟତା ନିର୍ମାଣ କଲ

କୃଷ୍ଣ ଅବତାରେ ଧର୍ମ ରକ୍ଷା ପାଇଁ

ପାଣ୍ଡବଙ୍କ ସଙ୍ଗେ ଥିଲ ।

ପ୍ରଜାନୁରଞ୍ଜନେ ମର୍ଯ୍ୟାଦା ପାଳନେ

ଅସହ୍ୟ ପୀଡ଼ା ସହିଲ

ବନବାସ ପୁଣି ପତ୍ନୀ ବିଚ୍ଛେଦକୁ

ଜୀବନେ ଯେ ସହ୍ୟ କଲ ।

ଚୈତ୍ର ମାସର ଶୁକ୍ଳ ନବମୀରେ

ସୂର୍ଯ୍ୟ ବଂଶେ ହେଲ ଜନ୍ମ 

ଦଶରଥ ପିତା କୌଶଲ୍ୟା ମାତାଙ୍କୁ

କରିଦେଲ ତୁମେ ଧନ୍ୟ ।

ରାମ ଅବତାରେ ଆଲୋକ ମହିଲେ

ତୁମେ ପ୍ରଭୁ ଜନ୍ମିଥିଲ

କୃଷ୍ଣ ଅବତାରେ କଂସ କାରା ଗୃହେ

ମେଘ ଅନ୍ଧାରେ ଜନ୍ମିଲ ।

ରାମ ଅବତାରେ ବନ ବାସ କାଳେ

କେତେ ଅସୁର ମାରିଲ

କୃଷ୍ଣ ଅବତାରେ ଅସୁରେ ଆସିଲେ

ତାଙ୍କୁ ବିନାଶ କରିଲ ।

ରାମ ଅବତାରେ ମର୍ଯ୍ୟାଦା ଦର୍ଶାଇ

ତ୍ୟାଗର ଦୃଷ୍ଟାନ୍ତ ଦେଲ

କୃଷ୍ଣ ଅବତାରେ ଧର୍ମ ଅଧର୍ମର

ପରିଣାମ ଦର୍ଶାଇଲ ।

ଯୁଗ ହିସାବ ରେ ରାମ ବାର କଳା

କୃଷ୍ଣ ଅବତାରେ ଷୋଳ

ସମ୍ମାନ ପାଇଁ କି ଲଢିଲ ଶ୍ରୀରାମ

ସଂସାର ପାଇଁ କି ଶ୍ୟାମ ।

ନିୟମ କାନୁନ ମର୍ଯ୍ୟାଦାର କଥା

ସ୍ଥାପିଲ ଆହେ ଶ୍ରୀରାମ

ନୀତି ନିୟମର ଉଲଙ୍ଘନ ଫଳ

ବତାଇଲ ଘନଶ୍ୟାମ ।

ରାମ ଅବତାରେ ବାଧା ମୁକ୍ତି ମାର୍ଗ

ତୁମେ ଯେ ଦେଖାଇଗଲ

କୃଷ୍ଣ ଅବତାରେ ସୁଖୀ ଜୀବନର

ପ୍ରେରଣା ଯେ ଦେଇଗଲ ।

ରାମ ଅବତାରେ ତାରିଲ ମାରିଲ

ବନରେ ବନରେ ବୁଲି

କୃଷ୍ଣ ଅବତାରେ ମରିଲେ ତରିଲେ

ତୁମ କଥା ଭାବି ଭାବି ।

ରାମ ଅବତାରେ ନ ମାଗିଲେ ପ୍ରଭୁ

ଯାଚି ତୁମେ ଦେଉଥିଲ

କୃଷ୍ଣ ଅବତାରେ ଚିହ୍ନି ଚିହ୍ନାଇ ଯେ

ମାଗିଲେ ଯେ ଦେଇ ଥିଲ ।

ରାମ ଅବତାରେ ଆଦର୍ଶ ମର୍ଯ୍ୟାଦା

ଜୀବନର ମାନଦଣ୍ଡ

କୃଷ୍ଣ ଅବତାରେ ପରିସ୍ଥିତି ଦେଖି

କାର୍ଯ୍ୟ ତୁମେ କରୁଥିଲ ।

ରାମ ଅବତାରେ କର୍ମ ଯୋଗେ ତୁମେ

ନିଷ୍କାମ କର୍ମ କରିଲ

ଭକ୍ତି ଯୋଗ କଥା ହେ ପୁରୁଷୋତ୍ତମ

ତୁମେ ବି ସ୍ଥାପନା କଲ |

ବୀର ହନୁମାନ ସମର୍ପଣ ଆଉ 

ଶବରୀ ଭାବର କଥା

ଭକ୍ତି ରସାମୃତ ବୁହାଇ ଥିଲ ହେ 

ସମାଜେ ସ୍ଥାପିଲ ଗାଥା ।

କୃଷ୍ଣ ଅବତାରେ କର୍ମ ଭକ୍ତି ସଙ୍ଗେ

ଜ୍ଞାନଯୋଗ ଯୋଡି ଦେଲ

ନିଷ୍କାମ କର୍ମ ଓ ଭାବ ଭକ୍ତି ସଙ୍ଗେ

ସଦ୍ ଜ୍ଞାନ କଥା କହିଲ ।

ରାମ ଅବତାରେ କୃଷି ବ୍ୟବସ୍ଥାରେ

ବନ ବ୍ୟବସ୍ଥା ଯୋଡିଲ 

ଆର୍ଥିକ ସ୍ଥିତିର ସୁଦୃଢତା ପାଇଁ

ସଙ୍କେତ ଯେ ଦେଇ ଗଲ ।

କୃଷ୍ଣ ଅବତାରେ କୃଷି, ବନ ସଙ୍ଗେ

ଗୋ-ପାଳନ ଯୋଡି ଦେଲ

ଆର୍ଥିକ ସ୍ଥିତିକୁ ସୁଧାରିବା ପାଇଁ

ଆଉ ଏକ ପାଦେ ଗଲ ।

ତୁମେ ଅଟ ରାମ ତୁମେ ଅଟ ଶ୍ୟାମ

ତୁମେ ତ ଯୁଗ ପୁରୁଷ

ରାମଙ୍କ ଚରିତ୍ର ଅନୁକରଣୀୟ 

କୃଷ୍ଣଙ୍କର ଚିନ୍ତନୀୟ ।

ଶାନ୍ତିର ସ୍ୱରୂପ ଆହେ ସୀତାପତି

ଅଟ ମର୍ଯ୍ୟାଦାର ସେତୁ

ଲକ୍ଷ୍ମଣ ରେଖା ର ମହତ୍ତ୍ୱର କଥା

ବୁଝାଇ ଦିଅ ହେ ପ୍ରଭୁ ।

ରୂପରେ ତୁମେ ଯେ ଦୁହେଁ ଅନୁପମ

ଅପୂର୍ବ ତୁମର କାନ୍ତି

କୃଷ୍ଣଙ୍କ ଆଖିରେ ଚଳ ଚଞ୍ଚଳତା

ରାମଙ୍କ ଆଖିରେ ଶାନ୍ତି ।

ମର୍ଯ୍ୟାଦା ସେତୁକୁ ଲମ୍ବାଇ ଦିଅ ହେ

ଏ ଧରା ଧାମକୁ ଥରେ

ଭ୍ରାତୃ ପ୍ରେମର ସେ ଅପୂର୍ବ ମହକ

ଛୁଟାଇ ଦିଅ ଧରାରେ ।

ତ୍ୟାଗର ବାରତା ଦିଅ ହେ ଶ୍ରୀରାମ

ଶ୍ୟାମ ପ୍ରେମ କଥା କୁହ

ନିଷ୍କାମ କର୍ମ ଓ ନିଃସ୍ଵାର୍ଥ ପ୍ରେମର

ବୀଜ ବୁଣି ଦେଇ ଯାଅ ।

ତୁମେ ଅଟ ରାମ ତୁମେ ଅଟ ଶ୍ୟାମ

ଧରାବତରଣ କର

ତୁମ ଆଦର୍ଶରେ ଏ ଧରା ବକ୍ଷରେ

ସବୁଜିମା ଭରିଦିଅ ।

ଆସ ଅବତରି ହେ ପୁରୁଷୋତ୍ତମ 

ବିଶ୍ଵକୁ ମୋହିତ କର

ବିପର୍ଯ୍ୟସ୍ତ ମନେ ତୋଳି ଦିଅ ପ୍ରଭୁ

ପଞ୍ଚବଟୀ ର ନିର୍ଯ୍ୟାସ ।

ମର୍ଯ୍ୟାଦାର ମନ୍ତ୍ର ଶିଖାଇ ଦିଅ ହେ

ରାଜ ଧର୍ମ ବି ଶିଖାଅ

ଆଧ୍ୟାତ୍ମବାଦ ର ଚରମ ସ୍ପର୍ଶରେ

ହୃଦୟ ହେଉ ସରସ ।


Rate this content
Log in