ନିଖୋଜ ସମ୍ପର୍କ
ନିଖୋଜ ସମ୍ପର୍କ
ଏତେ ନିବିଡ଼ତା ଥିଲା ସେ ସମ୍ପର୍କ
କେବେ ଦିନେ ନ ଦେଖିଲେ ।
ବ୍ୟାକୁଳିତ ଚିତ୍ତ ହେଉଥିଲେ ଦୁହେଁ
ପରସ୍ପରକୁ ଭେଟିଲେ ।୧।
ସମୟର ଚକ ଗଡି ଗଡି ଗଲା
ଗଲା ଦିନ ମାସ ବର୍ଷ ।
ଉଭୟେ ଥାଆନ୍ତି ମହା ଆନନ୍ଦରେ
ଲଭୁ ଥାଆନ୍ତି ହରଷ ।୨।
ଜଣେ ଜଣକର ସହଯୋଗୀ ହୋଇ
ରହିଥାନ୍ତି ସବୁକାଳେ ।
ଜଣକ ସୁଖରେ ଆନ ସୁଖ ଲଭେ
ଦୁଃଖେ ଦୁଃଖୀ ହୋଇ ଭାଳେ ।୩।
ପରସ୍ପର ମଧ୍ୟେ ଅଭେଦ ସମ୍ପର୍କ
ରହିଥାଏ ନିରନ୍ତର ।
ଯିଏ ଦେଖୁଥିଲା ଜାଣୁଥିଲା ତାଙ୍କ
ଜୀବନ ଏକ ପ୍ରକାର ।୪।
ଇତରେ ଦେଖିଲେ ଧନ୍ୟ ଏ ଦିଜଣ
ଧନ୍ୟ ଏହାଙ୍କ ଜୀବନ
ବିଧିର ବିଧାନ କେ କରିବ ଆନ
ଗଡି ଚାଲିଲା ଜୀବନ ।୫।
ଉଭୟେ ଚାଲିଲେ ଯାତ୍ରା ଉଦ୍ଦେଶ୍ୟରେ
କାହିଁ କେତେ ଦୂର ଦେଶ ।
ସବୁଠି ବୁଲିଲେ ସାଙ୍ଗ ହୋଇ ଦୁହେଁ
ଉଭୟେ ଲଭିଲେ ତୋଷ ।୬।
ଏ କଣ ଘଟିଲା ନିଖୋଜ ହୋଇଲା
ତାହାରି ଭିତରୁ ଜଣେ ।
ଖୋଜି ଖୋଜି ତାକୁ ହତାଶ ହୋଇଲା
ନ ପାଇଲା ଆନ କେଣେ ।୭।
ବୁଦ୍ଧି ବାଟ କିଛି ଦେଖା ଦେଲା ନାହିଁ
ଥାନାରେ ଡାଏରୀ ଦେଲା ।
ସାରା ରାଇଜରେ ପୋଲିସ୍ ଖୋଜୁଛି
ପତ୍ତା ତାର ନ ମିଳିଲା ।୮।
ନିଖୋଜ ହୋଇଛି ସମ୍ପର୍କ ତାଙ୍କର
ଆଜି ଯାଏଁ ବାଟ ଚାହିଁ ।
ବସିଛି ବନ୍ଧୁଟି ନିଖୋଜ ସମ୍ପର୍କ
ଖୋଜି ଖୋଜି ପାଉନାହିଁ ।୯।
ମନର ବେଦନା କାହାକୁ କହିବ
କିଏ ହରିବ ତା ଦୁଃଖ ।
ବିଭୁ କୃପା ହେଲେ ପୁଣି ଯୋଡି ହେବ
ତାର ନିଖୋଜ ସମ୍ପର୍କ ।୧୦।