ନିଃଶବ୍ଦ କାକଳି

ତୁମେମାନେ କେଉଁଠି ଅଛ ?

ଖୋଜୁଛି ତୁମକୁ ମୁଁ

ସ୍ମୃତି ଅଙ୍ଗନରେ 

ନିରୁଦ୍ଦିଷ୍ଟ ହୋଇଥିବା  

ଜହ୍ନ ଠିକଣା ରେ !!

ଏଠି , ସେଠି, ସବୁଠି ତ

ତୁମମାନଙ୍କର ଲୁଚକାଳି ଖେଳ

ମତେ ହଇରାଣ କରିବାରେ 

ପାଇଥାଅ ଅପାର ଆନନ୍ଦ

ମୁଁ ବି କିଛି କମ ନୁହେଁ 

ତୁମ୍ଭମାନଙ୍କ ଠାରୁ 

ସବୁବେଳେ ଧରି ପକାଏ 

ସାଧା କାଗଜରେ  

ଅଙ୍କା ବଙ୍କା ଅକ୍ଷର ଚିତ୍ରରେ ।

କେତେ କଷ୍ଟ କରିବାକୁ ପଡେ ମତେ 

ତୁମ ମାନଙ୍କୁ ଖୋଜିବା ପାଇଁ

କେବେ ଫୁଲର ମହକରେ 

ଝରା ବଉଳର ଆତୁର ଚିଠିରେ,

ପୁଣି କେବେ ପ୍ରଜାପତିର 

ଚିତ୍ରିତ ବର୍ଣ୍ଣାଳୀ ରେ------

କେବେ ପକ୍ଷୀ ଶାବକର 

ନରମ ଚଞ୍ଚୁରେ .............

ଆଖି ମେଲି ଚାହୁଁଥିବା କଅଁଳ 

ସୁରୁଜର ସୁନେଲି ମୁରୁଜରେ 

ମୁଁ ତୁମମାନଙ୍କୁ ଖୋଜୁଥାଏ 

କାକର ମୁକ୍ତାରେ,

ପଉଷ ଛିଟାରେ -----

ପୁଣି କେବେ ଚିହ୍ନା ଅଚିହ୍ନା ମୁହଁରେ 

ମେଘ ଭରା ଥମଥମ ଭାବରେ 

ଖୋଜିବସେ ଭସା ବାଦଲର 

ଅନାବୃତ୍ତ ତନୁର ଛୁଆଁରେ  ।

ଆଖି ଫେରି ଚାହିଁଲେ 

ମୁଁ ଆରମ୍ଭ କରିଥିବା ଯାତ୍ରାର ବିନ୍ଦୁରୁ

ଏ ଯାବତ ରହିଥିବା ପାନ୍ଥଶାଳା ଯାଏଁ

ସବୁଠି ତୁମ ମାନଙ୍କର ଆତଯାତ 

ଅନିର୍ଦ୍ଦିଷ୍ଟ ଲକ୍ଷ୍ୟରେ 

ଆଖି ମିଟିକା ମାରୁଥାଅ 

ନୀରିହ ଦୁଷ୍ଟାମୀରେ 

ମୋ ଅସହାୟତା ଦେଖି