ନବଯୌବନ ଦିବ୍ଯ ଦର୍ଶନ

ଚକା ବଇଠିକି ଚାହାଁରେ ମାନସ

ଚକା ବଇଠିକି ଚାହାଁ ।

ନବ ଯଉବନ ବେଶେ ଦରଶନ

ଦେଉଛନ୍ତି ଚଉବାହା ।୧।

ଅଣସରୁ ଆସି ଚକାବଇଠିରେ

ଉଭା ହୋଇଛନ୍ତି ବସି ।

ସ୍ନାନ ଯାତରାରୁ ଫେରି ଆସି ଜ୍ୱରେ

କମ୍ପୁଥିଲେ ବ୍ରହ୍ମରାଶି ।୨।

ଚକଟା ଭୋଗକୁ ପଣା ଭୋଗ ଖାଇ

ରହିଲେ ପନ୍ଦର ଦିନ ।

ପଥିରେ ରହିଲେ ଫୁଲୁରି ତଇଳ

ଶ୍ରାଅଙ୍ଗେ ହେଲା ଲେପନ ।୩।

ରାଜବୈଦ୍ୟ ଦଶମୂଳ ମୋଦକକୁ

ଆଣି ତାଙ୍କୁ ସମର୍ପିଲେ ।

ସୁସ୍ଥ ହୋଇ ପ୍ରଭୁ ଖଳିଲାଗି ହୋଇ

ପୁଣି ଖଡିଲାଗି ହେଲେ ।୪।

ରୂପକାର ରଙ୍ଗ ବୋଳି ଶ୍ରୀଅଙ୍ଗରେ

ନେତ୍ରୋତ୍ସବ ତାଙ୍କ ହେଲା ।

ନବ ଯଉବନ ରୂପ ଝଟ ଝଟ

ହୋଇ ଦେଖ ପ୍ରକାଶିଲା ।୫।

ନବ ଯଉବନେ ଦିବ୍ଯ ଦରଶନ

ଦେଉଛନ୍ତି ଦିଅଁ ମୋର ।

ଚାହିଁ ରହିଅଛି ଏ ବିଶ୍ବ ଭୁବନ

ଦେଖିବ ରୂପ ତାଙ୍କର ।୬।

ଧବଳ ବରନ ବଳୀ ବଳଭଦ୍ର

ସୁଭଦ୍ରା ହଳଦୀମୁହିଁ ।

ତ୍ରିପଣ୍ଡ କଜ୍ବଳ କଳା ଜଗନ୍ନାଥ

ସୁଦୃଶ୍ୟ ଚକ୍ର ଦିଶଇ ।୭।

ମହ ମହ ବାସେ କର୍ପୂର ଚନ୍ଦନ

ତୁଳସୀ ଦୟଣା ବାସ ।

ନବ ଯଉବନ ଦିବ୍ଯ ଦରଶନ

ଦେଉଛନ୍ତି ପୀତବାସ  ।୮।

ଉତ୍ସୁକ ହେଲେଣି ଘୋଷଯାତରାରେ

ତାରିବେ ପତିତ ଜନ ।

ଦିବ୍ଯ ଦରଶନ କର ଆଜି, କାଲି

କରିବୁ ରଥେ ଦର୍ଶନ  ।୯।

ଏ ବିଶ୍ବ ଭୁବନ ଦିବ୍ଯ ଦରଶନ

କରିବାକୁ ଅଛି ଚାହିଁ  ।

ପାତକୀ ପାତକ ନାଶିବେ ମୋ ପ୍ରଭୁ

ପଦ୍ମ ପାଦେ ଆଶ୍ରା ଦେଇ ।୧୦।