ନାରୀ
ନାରୀ
ଶରୀରରେ ମୋର ମନ ବି ରହିଛି,
ହସି ବି ପାରେ ମୁଁ କାନ୍ଦି ବି ପାରେ ମୁଁ !
ଆକାଂକ୍ଷା ବି ଅଛି, ଭାବନା ବି ଅଛି,
ହସି ବି ପାରେ ମୁଁ କାନ୍ଦି ବି ପାରେ ମୁଁ !
ଇସାରାରେ ତୁମ ସଦା ନାଚୁ ଥିବି,
ଭାବୁଥିଲେ ଏବେ ଆଉ ଭାବିବନି,
କଣ୍ଡେଇ ନୁହେଁ ମୁଁ ଜୀବିତ ମାନବ,
ହସି ବି ପାରେ ମୁଁ କାନ୍ଦି ବି ପାରେ ମୁଁ !
ଫୁଲ ଭାବି ମୋତେ ଭାଙ୍ଗି ଦବ ନାହିଁ,
ଜହ୍ନ କହି ମୋ ଠୁଁ ଦୂରେଇ ଯିବନି,
ସହି ପାରିବାର ସୀମା ବି ରହିଛି,
ହସି ବି ପାରେ ମୁଁ କାନ୍ଦି ବି ପାରେ ମୁଁ !
ଲାଜର ଗହଣା ଦେଇଛି ପ୍ରକୃତି,
ବଜାରର ଶୋଭା ଭାବୁଛ କାହିଁକି ?
ମାନବ ଜାତିର ଜନନୀ ସଜନୀ,
ହସି ବି ପାରେ ମୁଁ କାନ୍ଦି ବି ପାରେ ମୁଁ !
ଭଲ ପାଇବାର ଆଶା ବି ଅପାର,
ତୁମେ ଯଦି ନଈ ମୁଁ ଅଟେ ସାଗର,
ସମର୍ପି ଦିଏ ମୁଁ ପାଇଲେ ଆଦର,
ହସି ବି ପାରେ ମୁଁ କାନ୍ଦି ବି ପାରେ ମୁଁ !