Library
ନାରୀ ଓ ପୁରୁଷ
ନାରୀ ଓ ପୁରୁଷ
ପୂଣ୍ୟ କର୍ମ ବଳୁ ମନୁଷ୍ୟ ଜୀବନ
କରିଛନ୍ତି ସୃଷ୍ଟିକର୍ତ୍ତା
ସମାଜ ନିର୍ମାଣେ ନରନାରୀ ଭବେ
ଜାତ କଲେ ବିଶ୍ବକର୍ତ୍ତା ।
କରିଲେ ଭୂଷିତ ଦେଇ ସବୁ ଗୁଣ
ମନୁଷ୍ୟ ସମାଜ ପାଇଁ
ଦେଇ ସବୁ ଶକ୍ତି ସମ୍ପନ୍ନ କରିଲେ
ମନୁଷ୍ୟ ସୃଜନେ ଭୁଇଁ ।
ବୈଦିକ ବିବାହ ଜଡ଼ିତ କରିଲେ
ସଙ୍ଗରେ ପ୍ରେମ ବିବାହ,
ତହିଁ ଶାରୀରିକ ସମ୍ବନ୍ଧ ମନୁଷ୍ୟେ
ଦାମ୍ପତ୍ୟ ପ୍ରେମ ଉତ୍ସାହ ।
ସନ୍ତାନ ସଞ୍ଚାର ନାରୀ ଗର୍ଭେ ତହୁଁ
ନାରୀ ପୁରୁଷ ସମ୍ବନ୍ଧୁ
ଦଶ ମାସ ଧରେ ଗର୍ଭରେ ସନ୍ତାନ
ଦୁହେଁତ ପ୍ରାଣର ବନ୍ଧୁ ।
ନାରୀ ଓ ପୁରୁଷ ଯୋଗୁଁ ଏସଂସାର
ସୃଷ୍ଟିକର୍ତ୍ତାଙ୍କ ଭିଆଣ
ମାନବ ସମାଜ ଅଙ୍କୁରିତ କଲେ
ନାରୀ ପୁରୁଷ କର୍ମେଣ ।
ପାଳନ୍ତି ସନ୍ତାନେ ନିଜ ସୁଖ ଭୁଲି
ଶିକ୍ଷିତ କରନ୍ତି ତାରେ,
ସମ ବ୍ୟବହାର ପୁତ୍ର ଓ ପୁତ୍ରିଙ୍କୁ
ନାହିଁ ଭେଦଭାବ କାରେ ।
ଗୃହର ସଂସ୍କାର ସତ୍ୟ ତ୍ୟାଗ ପ୍ରୀତି
ଦିଅନ୍ତି ସନ୍ତାନେ ତାଙ୍କ
ଭକ୍ତି ସେବା ଧର୍ମ ଜ୍ଞାନ ଭରୁ ଥାନ୍ତି
ଥାଏ ବଳିଦାନ ଅଙ୍କ ।
କର୍ମଜ୍ଞାନ ନିତ୍ୟେ ସନ୍ତାନେ ଦିଅନ୍ତୁ
ନାରୀ ଓ ପୁରୁଷ ଦୁହେଁ
ଦୁଇ ଆତ୍ମା ହୁଏ ଏକ ଆତ୍ମା ଯହୁଁ
ପ୍ରେମ ଭାବ ଥାଏ ମୁହେଁ ।
ବରାବର ଭାବ ଗୃହରେ ରଖନ୍ତି
ଥାଏ ସେବା ଭାବ ତହିଁ
ପିତୃମାତୃସେବା ଗୃହରେ କରନ୍ତି
ସନ୍ତାନ ଦେଖନ୍ତି ଯହିଁ ।
ଥାଏ ପ୍ରେମଭାବ ପ୍ରତିପୋଷଣରେ
ନାରୀ ପୁରୁଷଙ୍କ ଦୁହେଁ,
କରିଛି ବିଧାତା ପତିପତ୍ନୀ ତାଙ୍କୁ
ସମାଜ ନିର୍ମାଣ କର୍ମେ ।
ଅତିଥି ସତ୍କାର ଧର୍ମ ଗୃହସ୍ତରେ
ଦୁହେଁ କରୁଥାନ୍ତି ନିତି
ପ୍ରଭୁ ଜଗନ୍ନାଥେ ଭକ୍ତି ରଖିଥାନ୍ତି
ଅନାଦି ଅନନ୍ତେ ପ୍ରୀତି ।
ବ୍ରହ୍ମାଣ୍ଡ ସମାଜ ମନୁଷ୍ୟ ସମାଜ
ନାରୀ ଓ ପୁରୁଷ ବଳୁ,
ସବୁତ ଭିଆଣ ସୃଷ୍ଟିକର୍ତ୍ତାଙ୍କର
ଦୁର୍ଲ୍ଲଭ ଜୀବନ କୋଳୁ ।
