Library
Profile
ମୁଠାଏ ଭାତ
ମୁଠାଏ ଭାତ
ନିବାରିଣ କ୍ଷୁଧା ବଞ୍ଚାଏ ଜୀବନ
ଅମୃତ ମୁଠାଏ ଭାତ
ଅନ୍ନର ବିହୁନେ ହୁଏ ହ°ସା ହାନୀ
ମୃତ୍ୟୁ ଅଟେ ସୁନିଶ୍ଚିତ ।
ଅନ୍ନ ବ୍ରହ୍ମ ରୂପେ ପରମ ନମସ୍ୟ
ସୂଚି ବ୍ରତେ ସେବନୀୟ
ଧାନ୍ୟ ମହାଲକ୍ଷ୍ମୀ ବନ୍ଦିତା ପୂଜିତା
କୃଷି କର୍ମ କରଣୀୟ ।
ଉତ୍ତମ ପ୍ରସ୍ତୁତ ପାକସିଦ୍ଧ ଅନ୍ନ
ଦାନ ଧରମ ଭୋଜନ
ଭରିଦିଏ ମନେ ତୃପ୍ତି ଓ ଆନନ୍ଦ
ଅନ୍ନଦାନ ମହାପୁଣ୍ୟ ।
ପରୋପକାରାର୍ଥେ କର୍ତ୍ତବ୍ୟ କରମ
ସମ୍ପାଦିତ ମହା ଯଜ୍ଞ
ସୃଜେ ଜଳକଣ ବରଷେ ବାରିଦ
ଅନ୍ନ ହୁଏ ଉତ୍ପାଦନ ।
ଶ୍ରମ ଝାଳ ବିନା ସମର୍ଥ ମଣିଷ
ଭୋଜନ ଶାସ୍ତ୍ର ନିଷିଦ୍ଧ
ଆଳସ୍ୟଗ୍ରସ୍ତଙ୍କୁ ଭୂରି ଓ ଭୋଜନ
ପ୍ରଦାନେ ମୁର୍ଖ ନିର୍ବୋଧ ।
ନୀୟମ ବିରୁଦ୍ଧ କଲେ ଆଚରଣ
କୁପିତ ହୁଏ ପ୍ରକୃତି
ପାପର ପ୍ରଭାବୁ ଫଳ ବିପରୀତ
ଘୋଟଇ ମହା ବିପତ୍ତି ।
ନୀୟମିତ ବୃଷ୍ଟି କୃଷି ଉତ୍ପାଦନ
ହୋଇଥାଏ ପ୍ରଭାବିତ
କୃଷକ ସହଇ ଅପୂରଣ କ୍ଷତି
ବ୍ୟାପଇ ରୋଗ ଦୁର୍ଭିକ୍ଷ ।
ମେଲାଖାଉ ଲୋକେ ମାରନ୍ତି ହେକୁଟି
ଲୁଟିଖିଆ ବଡ଼ ଲୋକ
ମରେ ମଧ୍ୟବିତ୍ତ ମୂଲିଆ ଶ୍ରମିକ
ଚାଷୀ ହୁଏ ସର୍ବସ୍ୱାନ୍ତ ।
ଦିଅ ସଦବୁଦ୍ଧି ଜଗତ ଜନଙ୍କୁ
ମହାପ୍ରଭୁ ଜଗନ୍ନାଥ
ହେଉ ସ୍ୱାଭିମାନେ ଜୀବନ ସାର୍ଥକ
ପ୍ରସାଦ ମୁଠିଏ ଭାତ ।
