ମୁଁ ଏକ ଶିଶୁଟିଏ
ମୁଁ ଏକ ଶିଶୁଟିଏ
ମୁଁ
ଏକ ଶିଶୁଟିଏ,
କୁଆଁ କୁଆଁ କରି
ଜନ୍ମ ନେଲି
ବସୁଧାର ବକ୍ଷେ,
ମା'ର କୋଳରେ
ଚାରିକାନ୍ଥ ଘେରା
ଏନ୍ତୁଡ଼ି ଶାଳରେ
ଅବା ସରକାରୀ
ଡାକ୍ତରଖାନାର
ପ୍ରସୂତି ଘରେ ।
ମୁଁ
ଏକ ଶିଶୁଟିଏ,
କୁହନ୍ତି ଲୋକେ
ମୁଁ ଆଗାମୀ କାଲିର
ନାଗରିକ
ମୋ ଦେଶର ଭବିଷ୍ୟତ,
ମୁଁ କୁଆଡେ
ରକ୍ଷା କରିବି ମୋ ଦେଶକୁ
ସେଥିପାଇଁ ନେଲି
ପୋଲିଓ ବୁନ୍ଦାକୁ
ଆଉ ସାଲାଇନ୍
ଇଂଜେକ୍ସନ୍ କେଞ୍ଚାକୁ ।
ମୁଁ
ଏକ ଶିଶୁଟିଏ,
ଚାଲି ଜାଣୁ ନଜାଣୁ
ମୋତେ ଦାଖଲ କଲେ
ନର୍ସରୀ ସ୍କୁଲରେ
ଭାରି ବହି ବସ୍ତାନୀର ସାଥେ,
ଖାଇବା ସ୍ୱାଦ
ଚାଖିବା ଆଗରୁ
ଇଂରାଜୀ ଶବ୍ଦ
ଗାଇଲି ମୁଖେ ।
ମୁଁ
ଏକ ଶିଶୁଟିଏ,
ଇଂରାଜୀ ସ୍କୁଲର
ଦାମୀ ୟୁନିଫର୍ମରେ
ଆଉ ଟାଇ ଓ ଜୋତାର
ବନ୍ଧନ ଭିତରେ,
ଶ୍ୱାସରୁଦ୍ଧ ହୋଇଗଲି
ସାରା ଜୀବନ
ହୋମୱାର୍କ, ଟିଉସନ
ଆଉ ପ୍ରୋଜେକ୍ଟ
କାମର
ଶୃଙ୍ଖଳା
ଭିତରେ ।
ମୁଁ
ଏକ ଶିଶୁଟିଏ,
ମୋତେ ଖେଳିବାକୁ
ସମୟ ନାହିଁ
ସାଂଗ ସାଥି ହୋଇ
ମୁଁ ଯାଏନା କାହିଁ,
ଯାନି ଯାତରା
ପୁନି ଓ ପରବ
କେବେ ଆସେ
ମୋତେ
ମାଲୁମ ନାହିଁ ।
ମୁଁ
ଏକ ଶିଶୁଟିଏ,
ବନ୍ଧୁ ବାନ୍ଧବଙ୍କୁ
ଚିହ୍ନଇ ନାହିଁ
ବିଭା ବ୍ରତ ଘରେ
ମିଳଇ ନାହିଁ
ଆଜି ୟୁନିଟ୍ ଟେଷ୍ଟ
ଓ କାଲି
କଂପ୍ୟୁଟର ଟେଷ୍ଟରେ
ମୁଁ ସର୍ବଦା
ଘାଣ୍ଟି ହେଉଥାଇ ।
ମୁଁ ଏକ ଶିଶୁଟିଏ,
ମାଡିଚାଲି ଅଛି
କରୋନାର ଲହର ପରେ
ଲହର,
ମାସ୍କ, ସାନିଟାଇଜର ଆଉ
ତାଲାବନ୍ଦର କହର,
ବିଦ୍ୟାଳୟ ପାଠପଢା
ସବୁ ଅଟେ ଆଜି ଜହର,
ଭବିଷ୍ୟତ ମୋର ଅନ୍ଧକାର
ମୋ ସାଙ୍ଗପିଲାଏ ଆଜି
ଶିଶୁଶ୍ରମିକର ଶିକାର ।