ଆକାଶ

ଆକାଶ ଡାକୁଛି ହାତ ଠାରି ମୋତେ

ମୋ କୋଳେ ଖେଳିବୁ ଆ'ରେ ଆ

ମୁକୁଳା ଛାତିରେ ନାଚିବୁ କୁଦିବୁ

ବଉଦରେ ବସି ଭାସିବୁ ଆ..

ମେଘ ରାଇଜକୁ ଦେଖିବୁ ତୁ ବୁଲି

ବରଷା କରିବ ତୋତେ ରେ ଗେଲ

ଛାନିଆ ହେବୁନି ଗରଜିବ ଯେବେ

ଘଡଘଡି ତାର ବଜାଇ ଢୋଲ ।

ପୂରୁବ ଆକାଶୁ ସୂରୁଯ ଉଇଁବେ

ପଶ୍ଚିମରେ ଯିବେ ଘରକୁ ଫେରି 

ଏଠି ତୋତେ ଜମା ଖରା କାଟିବନି

ଦିଗ ଚଉଦିଗ ହେମାଳ ଭାରି ।

ଖୁସି ମନେ ଏଠି ପକ୍ଷୀ ଉଡୁଥିବେ 

ମେଲିଦେଇ ତାଙ୍କ କଅଁଳ ଡେଣା

ଏଇଠୁ ଦେଖିବୁ ମାଟି ମାଆକୁ ତୋ

ସବୁଜିମା ଭରା ଫୁଲ ଅଗଣା ।

ସଞ୍ଜ ନଇଁଗଲେ ଅନ୍ଧାର ସାଥିରେ

ପାଦ ଗଣିଗଣି ଆସିବ ରାତି

ତାରା ଫୁଲ ସବୁ ମିଟି ମିଟି ହେବେ

ଚକମକ କରି ରାତିର ଛାତି ।

ତୁମ ରାଇଜରେ ସବୁଦିନ ସିନା

ଦେଖାଯାଏନାହିଁ ରୂପେଲି ଜହ୍ନ

ଏଠି କିନ୍ତୁ ନିତି ଦେଖିବୁ ଜହ୍ନକୁ

ଜୋଛନା ତା ନେବ କିଣି ତୋ ମନ ।

ବେଳେବେଳେ ଏଠି ଉଲ୍କା ଖସନ୍ତି

ଲାଗଇ ଯେମିତି ଖସଇ ତାରା

ତାରା ଖସିଲେତ ଖଣ୍ଡ ପ୍ରଳୟରେ

ଛାରଖାର ହେବ ଦୁନିଆ ସାରା ।

ଆକାଶ କହିଲା ଏତେ କଥା ମୋତେ,

ଯିବା ପାଇଁ ହେଲା ଉଛନ୍ନ ମନ

ତରତର ହୋଇ ସଜବାଜ ହେଲି

ଭାଙ୍ଗିଗଲା ମୋର ମିଠା ସପନ ।