ମୋ ମନର ଆଶା ଓ ଆକାଂକ୍ଷା

ବ୍ୟକ୍ତି ଓ ସମାଜ ପରସ୍ପର ମଧ୍ୟରେ 

ସଦା ରହିଛି ଗଭୀର ସମ୍ବନ୍ଧ

ସମାଜ ହେଲେ କଳୁଷିତ, ମଣିଷ ହୁଏ 

ଦୂଷିତ, ଉନ୍ନତିର ରାସ୍ତା ବନ୍ଦ ।

ସମାଜରେ, ସେ ଏକ ମଣିଷ ଆଉ 

ଅମୁକ ଜଣେ ତ ଭଲ ମଣିଷ 

ପାର୍ଥକ୍ୟ, ଭଲ ମଣିଷ ଭିତରେ ହୁଏ 

ମାନବିକତାର ପରିପ୍ରକାଶ ।

ମାନବିକତାର ପ୍ରକାଶ ହୋଇଥାଏ

ବାହ୍ୟ ଆଚରଣରେ ପ୍ରସ୍ଫୁଟିତ 

ପ୍ରସ୍ଫୁଟିତ ହୁଏ, ଜଣେ ଅନ୍ୟର ଲୁହକୁ 

ଯଦି ପୋଛିବାକୁ ସଦା ଚେଷ୍ଟିତ ।

ପାଖରେ ଧନ ସମ୍ପତ୍ତି ନଥାଇ ପାରେ, 

ସେ ମନରେ ଗରିବ ନୁହେଁ

ଯାହା ଚିନ୍ତାଧାରା ଓ ଲକ୍ଷ୍ୟ ମହତ ତାକୁ 

ନିଶ୍ଚିତ ବଡ କରି ପାରିଥାଏ ।

ସ୍ନେହ ପ୍ରେମର ଭାବନା ବିକଶିତ ହୁଏ 

ହିଂସା ଦ୍ୱେଷରୁ ଦୁରେଇଲେ

ସମଗ୍ର ବିଶ୍ୱ ହିଁ ସୁନ୍ଦରମୟ ଲାଗିଥାଏ 

ମନର ଭାବନା ସୁନ୍ଦର ଥିଲେ ।

ମଣିଷର ପ୍ରକୃତିରେ ଅତି ଦୃଷ୍ଟ ଅହଂକାର 

ଅଟେ ମନର ସୋଦର

ସମସ୍ତ ପଦାର୍ଥ ଓ ମଣିଷ ଉପରେ ଆଧିପତ୍ୟ 

ନେବା ପାଇଁ ସତତ ତତ୍ପର ।

ମଣିଷର ଆଶା ଓ ଆକାଂକ୍ଷାର ରାସ୍ତା 

ସର୍ବଦା ଅଟେ ଲମ୍ବାଳିଆ

ଧନ ଯୌବନ କ୍ଷମତା ଗର୍ବେ ହରେଇ ନିଜର

ବିଚାରଶକ୍ତି, ଧନ ଅର୍ଜିବାକୁ ହୁଏ ଠିଆ ।

ମନରୁ, କେହି ରହିନାହିଁ ରହିବେ ନାହିଁଟି 

ଭବ ରଙ୍ଗ ଭୂମି ତଳେ,

ସର୍ବେ ନିଜ ନିଜ ଅଭିନୟ ସାରି ବାହୁଡିବେ 

କାଳ ବଳେ, ତତ୍ତ୍ୱକୁ ଭୁଲେ  ।

ପୁଂଜିବାଦୀ ସମାଜରେ ଅର୍ଥ ଠୁଳ କରିବା

ଏକମାତ୍ର ଲକ୍ଷ୍ୟ ରହେ

ସତ୍ ଅସତ୍ ଆଉ କିଛି ନାହିଁ,ମଣିଷ ତ 

ମଣିଷପଣିଆକୁ ବଳି ପକାଇ ଦିଏ  ।

ପୁଂଜିର ନିଶାରେ ଭୁଲିଯାଏ ମନୁଷ୍ୟର 

ଏହି ଜୀବନ କ୍ଷଣ ସ୍ଥାୟୀ

କାମ କ୍ରୋଧ ଲୋଭ ମୋହ ଅହଂକାର 

ଗୁଣର ସେ ବଶବର୍ତ୍ତୀ ହୋଇ  ।

କିଛି ଅମଣିଷ ନିଜ କାମନା ଓ ଲାଳସାକୁ 

ଚରିତାର୍ଥ କରିବାକୁ ଯାଇ

ପରିଣତି ଭୟାବହ କରନ୍ତି ନିଜର ନିହିତ 

ସ୍ୱାର୍ଥକୁ ଜାରି ରଖିବା ପାଇଁ  ।

ନୀତି ଆଦର୍ଶ ଓ ମର୍ଯ୍ୟାଦାର ଲକ୍ଷ୍ମଣ ରେଖା 

ଭୁଲି ଯାଇ ବିପଥଗାମୀ ହୁଏ

ମାନସିକ ଦ୍ଵନ୍ଦ, ପରଶ୍ରୀକାତରତା, ଯୁଦ୍ଧର 

ଅବସ୍ଥା ହିଂସା ଓ ଦ୍ଵେଷ ଭରି ଦିଏ  ।

ସଦା ଭୋଗିବାକୁ ପଡ଼ିଥାଏ ଫଳ ସମାଜକୁ 

ଅର୍ଥ ସର୍ବସ୍ୱ ବିଚାରର 

ରହିଛି ବହୁତ ଉଦାହରଣ, ଖୋଜିଲେ ପୃଷ୍ଠା

ଇତିହାସ ଭିତର  ।

ସବୁ ଅନ୍ୟାୟ ଅନାଚାର ଅତ୍ୟାଚାର 

ଶୋଷଣର ସମାଧାନ ପାଇବାକୁ 

ଯିବାକୁ ହୁଏ ସଦା ସର୍ବଦା ମଣିଷକୁ 

ପ୍ରଥମେ ତୃଣମୂଳ ସ୍ତରକୁ  ।

ସମାଜର ତୃଣମୂଳ ସ୍ତର ଅଟନ୍ତି ଶିଶୁମାନେ, 

ସଦା ଦେଶର ଭବିଷ୍ୟତ

ବର୍ତ୍ତମାନ ମହତ୍ୱପୂର୍ଣ୍ଣ ବିଷୟ ଜାଣିବା ଶିଶୁ 

ମାନଙ୍କୁ କିଭଳି ଶିକ୍ଷା ଦେବା ଉଚିତ ।

ସ୍ୱାଭାବିକ, ବାପା ମା, ଉଜ୍ଜ୍ୱଳ ଭବିଷ୍ୟତ 

କାମନା କରନ୍ତି ନିଜ ସନ୍ତାନର  

ଅଭିଭାବକଙ୍କ ମଧ୍ୟରେ ଅଛିକି ଶିକ୍ଷା ଦେଇ 

ସୁନାଗରିକ କରି ଗଢି ତୋଳିବାର ।

ଉଦ୍ଦେଶ୍ୟ ରହେ ପରୀକ୍ଷାରେ ରଖୁ ପିଲା 

ନବେ ପ୍ରତିଶତରୁ ଉର୍ଦ୍ଧ୍ୱ ନମ୍ବର

ଭଲ ମଣିଷ ହେଉ, ଉଣା ରହୁଛି ନୈତିକତା 

ଶିକ୍ଷା ଦେବାରେ ଆମର ।

ଭାବନା ରହୁଛି ପିଲାଟିଏ ପାଠ ପଢି ବଡ 

ଚାକିରୀ କରିବ  

ବିଦେଶରେ ରହିବ, ମେଞ୍ଚେ ମେଞ୍ଚେ ଟଙ୍କା 

କମେଇ ବ୍ୟାଙ୍କ ବାଲାନ୍ସ ବଢ଼େଇବ ।

ସମାଜରେ ପିଲାଙ୍କ ଭବିଷ୍ୟତ ଗଠନରେ

କଳୁଷିତ ରାସ୍ତା ବନ୍ଦ ହୁଏନି

ଏମତି ଚିନ୍ତାଧାରାର ବଶବର୍ତ୍ତୀ ହୋଇ,

ସୁଚିନ୍ତନ ପ୍ରତି ଗୁରୁତ୍ୱ ଦିଆ ହୁଏନି  ।

ପିଲା ବିଶୃଙ୍ଖଳିତ ହୋଇ କୁପଥଗାମୀ ହୁଏ

ଏହି ଅର୍ଥ ସର୍ବସ୍ୱ ତତ୍ତ୍ୱରେ 

ଉଚ୍ଚ ପଦବୀରେ ଅଧିଷ୍ଠିତ ହୋଇ ମଧ୍ୟ ତାଙ୍କର

ସ୍ଖଳନ ଦେଖା ଦିଏ ଚରିତ୍ରରେ ।

ସମାଜକୁ ଶୃଙ୍ଖଳିତ କରିବା ପାଇଁ ଉତ୍ତମ 

ମଣିଷର ରହିଛି ଆବଶ୍ୟକତା 

ଚରିତ୍ର ଗଠନ ଶିକ୍ଷାରେ, ପରିକଳ୍ପନାରେ 

ନରହି ପାଇବା ବାସ୍ତବିକତା ।